ԱՄՆ Պետքարտուղար Մայք Պոմպեոն այս պաշտոնում առաջին անգամ ժամանել է Ռուսաստան՝ նախագահ Վլադիմիր Պուտինի եւ իր գործընկեր Սերգեյ Լավրովի հետ բանակցություններ անցկացնելու համար, հաղորդում է «ՌԻԱ Նովոստին»:
Պոմպեոն ուղեւորվել է Լավրովի հետ բանակցություններին, իսկ երեկոյան երկու երկրների արտգործնախարարները կհանդիպեն Պուտինին:
Բանակցությունների օրակարգում երկկողմ հարաբերություններն են, ռազմավարական կայունությունը եւ զինաթափման խնդիրները, Վենեսուելայում, Սիրիայում, Ուկրաինայում եւ Կորեական թերակղզում իրավիճակը, ինչպես նաեւ Իրանի միջուկային ծրագրի գործողությունների համատեղ համապարփակ ծրագրի շուրջ ճգնաժամը: Կողմերը կարող են անդրադառնալ հունիսին G20- ի գագաթնաժողովի շրջանակներում Ճապոնական Օսակա քաղաքում Ռուսաստանի եւ ԱՄՆ-ի ղեկավարների հանդիպման հնարավորությանը:
