Տեղեկատվական տեխնոլոգիաների եւ ծառայությունների համաշխարհային դաշինքի (WITSA) գլխավոր քարտուղար Ջեյմս Պոյսանտը Հայաստանում է:
Նա հետեւում է, թե ինչպես է նախապատրաստվում Տեղեկատվական տեխնոլոգիաների համաշխարհային համաժողովը (WCIT 2019), որ կայանալու է աշնանը Երեւանում:
NEWS.am-ի հետ զրույցում Պոյսանտն անդրադարձել է համաժողովից իր սպասումներին եւ կարծիք հայտնել Հայաստանի IT-հատվածի մասին: Նա ընդգծել է, որ տեղեկատվությունն ու հաղորդակցությունն ազդում են գրեթե բոլոր բնագավառների վրա:
«Ցանկացած հանրության վրա դրանց պոտենցիալ ազդեցությունը մեծ է բոլոր բնագավառներում՝ բժշկություն, տրանսպորտ, շրջակա միջավայր»,- ասել է Պոյսանտը՝ հավելելով, որ կազմակերպիչներն այս տարի ջանասիրաբար են աշխատում:
Նրա խոսքով՝ ամենամեծ առավելությունն այն է, որ WCIT 2019-ն անցկացվելու է Հայաստանում, եւ շեշտը դրվելու է Հայաստանի վրա՝ ցույց տալու երկրի ուժը, մշակույթի գեղեցկությունն ու հյուրասիրությունը։ Ի վերջո, այդ ամենի նպատակը, ըստ Պոյսանտի, Հայաստան ներդրումներ բերելն է:
WITSA-ի գլխավոր քարտուղարն ակնկալում է, որ ավելի քան 60 երկրներից մոտ 2000 մարդ կմասնակցի համաժողովին: «Նպատակն ավելի շատ մարդկանց ներգրավելն ու WCIT-ից հնարավորին օգուտ քաղելն է»,- եզրափակել է նա:
Նշենք, որ «WCIT 2019 -ՏՏ համաշխարհային համաժողովը» տեղի կունենա Երևանում, հոկտեմբերի 6-9-ին։ Համաժողովը հյուրընկալվում է ՀՀ կառավարության բարձր հովանու ներքո և աջակցությամբ։ ՏՏ համաշխարհային համաժողովը հիմնադրվել է Տեղեկատվական տեխնոլոգիաների և ծառայությունների համաշխարհային դաշինքի կողմից։ Համաժողովը կազմակերպում է Առաջատար տեխնոլոգիաների ձեռնարկությունների միությունը։
