Ռոբերտ Քոչարյանը չունի մեղադրյալի պատշաճ կարգավիճակ և չի կարող ենթարկվել քրեական պատասխանատվության։ Այս մասին այսօր՝ մայիսի 16–ին Երևան քաղաքի ընդհանուր իրավասության դատարանում ՀՀ երկրորդ նախագահ Ռոբերտ Քոչարյանի խափանման միջոցի հիմնավոր լինել–չլինելու հարցի քննությանը հայտարարեց Քոչարյանի պաշտպանական խմբի անդամ Արամ Օրբելյանը։
Փաստաբանը, վկայակոչելով Վճռաբեկ դատարանի հայտնած իրավական դիրքորոշումներից մեկը, հայտնեց, որ դատավորը պարտավոր է ստուգել արդյոք նախաքննական մարմինը ներկայացրել է փաստեր, տեղեկություններ այն մասին, որ նախաքննության ընթացքում անձին, որպես մեղադրյալ ներգրավելու մասին որոշում է կայացվել, նրան պարզաբանվել է մեղադրանքի էությունը, հակառակ դեպքում անձի կալանավորումը և նրա անձնական անձեռնմխելիության սահմանափակումը կհամարվի կամայական և անօրինական։
«Վճռաբեկ դատարանի դիրքորոշման համաձայն, որպեսզի անձը լինի մեղադրյալ, դրա մասին որոշում պետք է կայացվեր, այդ մասին տեղեկացվեր մեղադրյալին, այս դեպքում պարոն Քոչարյանին, նրան պարզաբանվեր իր իրավունքններն ու պարտականությունները»,–ասաց նա՝ նշելով, որ նախաքննական մարմինը 2018թ. նոյեմբերի 2–ին լրացնելով և փոփոխելով Քոչարյանին առաջադրված մեղադրանքը, դրա էությունը պատշաճ կերպով չի պարզաբանել նրան։
«2018թ. նոյեմբերի 2–ին քննիչը որոշում է կայացրել Ռոբերտ Քոչարյանին, որպես մեղադրյալ ներգրավելու մասին, այդ մասին տեղյակ պահել կողմին, նույն օրը Քոչարյանին է դրամադրվել ամբողջական ձևաթուղթ՝ պաշտպան ունենալու, մեղադրյալին նրա իրավունքներն ու պարտականությունները բացատերլու մասին, սակայն թե Ռոբերտ Քչոարյանը և թե նրա պաշտպան Հայկ Ալումյանը պարզաբանել են, որ մեղադրանքը պարզ չէ»–ասաց նա։
Այնուհետև ըստ պաշտպանի՝ Ռոբերտ Քոչարյանը հարցաքննվել է և ասել, որ մեղադրանքի էությունն իրեն պարզ և հասկանալի չէ։
«Մասնավորապես Քոչարյանը հայտնել է, որ իրեն հատկապես հասկանալի չէ, թե ու՞մ են նկատի ունեցել «մերձավորի և նրա թիկնազորի անդամներ» ասելով, ե՞րբ են ըստ մեղադրանքի՝ կեղծվել փաստաթղթերը, և դրանք ի՞նչ առնչություն ունեն իր հետ»,–նշեց Օրբելյանը։
Այնուհետև Քոչարյանի պաշտպան Հայկ Ալումյանը նոյեմբերի 5–ին դիմում է ներկայացրել քննիչին՝ խնդրելով պարզաբանել առաջադրված մեղադրանքը, նշելով, որ միայն դրանից հետո կարող է Քոչարյանը ցուցմունք տալ, սակայն Օրբելյանի խոսքով՝ քննիչ, ըստ էության, հարցին չի անդրադարձել, չի ասել, որ այն պարզ է, ընդամենը նշել է, որ իրենք պարտավոր էին մեկ օրինակ տալ մեղադրայալին, որը տվել են։
Նա նշեց, որ Ռոբերտ Քաչարյանը հրաժարվել է ստորագրել արձանագրությունը՝ ոչ հստակ համարելու պատճառաբանությամբ։
Օրբելյանի խոսքով՝ նախաքննական մարմինն առանց բացատրելու մեղադրանքի էությունը, մեղադրական եզրակացությունն ուղարկել է դատարան։
«Պարոն Քոչարյանի չունի մեղադրյալի պատշաճ կարգավիճակ և առնվազն այս փուլում չպետք է նրա նկատմամբ կալանք կիրառվի»,–ընդգծեց Արամ Օրբելյանը։
Հիշեցնենք, որ Երևան քաղաքի ընդհանուր իրավասության դատարանում՝ դատավոր Դավիթ Գրիգորյանի նախագահությամբ արդեն 4–րդ օրն է ընթանում է ՀՀ երկրորդ նախագահ Ռոբերտ Քոչարյանի խափանման միջոցի հիմնավորվածության վերաբերյալ հարցի քննությունը։
Ռոբերտ Քոչարյանը մեղադրվում է ՀՀ սահմանադրական կարգը տապալելու, ինչպես նաեւ իր պաշտոնեական դիրքն օգտագործելով «Թի Էս Էս Սի Արմենիա» ՍՊ ընկերության միակ մասնակից եւ տնօրեն Սիլվա Համբարձումյանի օգտին գործողություններ կատարելուն նպաստելու համար առանձնապես խոշոր չափերով կաշառք ստանալու համար։
