Ենթադրում եմ, որ «Աշխատիր Հայաստան» ծրագրի շրջանակներում մենք որոշ միջոցառումներ նախաձեռնելու ենք այն քաղծառայողների համար, որոնք դուրս են մնալու քաղծառայության համակարգից: Այս մասին, այսօր՝ մայիսի 16-ին լրագրողների հետ զրույցում ասաց ՀՀ փոխվարչապետ Տիգրան Ավինյանը, անդրադառնալով՝ կառավարության կառուցվածքի փոփոխությունների արդյունքում սպասվող կրճատումներին: Նա ասաց, որ առայժմ մասսայական կրճատումներ չկան, եւ առաջին փուլում չեն էլ պլանավորվում:
«Նախարարությունների կրճատումը ընդհանուր քաղծառայության համակարգի ռեֆորմի, կարելի է ասել, առաջին նախնական փուլն է: Քաղծառայության ռեֆորմն իրենից ենթադրելու է մի քանի փուլ: Առաջին հերթին մենք որդեգրելու ենք ընդհանուր ստրատեգիա՝ քաղծառայության համակարգի զարգացման, օպտիմալացման ու արդյունավետության բարձրացման համար»,- ասաց փոխնախարարը եւ ավելացրեց, որ դժվարանում է պատասխանել, թե քանի փոխնախարար կլինեն ամեն մի նախարարությունում:
«Գործառույթներից ելնելով է որոշվելու, գնահատելու ենք, թե ինչ ֆունկցիաներ են նախկինում եղել, փոխնախարարների վրա արդյոք թերբեռնված են կամ գերբեռնված են եղել այդ փոխնախարարները, եւ ըստ ֆունկցիաների եւ ըստ գործառույթների այդ քանակները կհստակեցվեն, նաեւ նշեմ, որ սա կարող է շարունակական պրոցես լինել: Կարող է այս փուլում 6 կամ 7 նախարար լինել, հաջորդ փուլում՝ 4»,- ասաց նա:
Ավինյանի կարծիքով, պետական համակարգից մասնավորի անցումը ժամանակ առ ժամանակ մարդկանց համար օգտավետ կարող է լինել.
«Նույն ստատիկ կերպով շարունակել չենք կարող, եւ չենք ուզում, որովհետեւ բոլոր գնահատականները ապացուցում են, որ մեր հանրային ծառայության համակարգն արդյունավետ չի գործում։ Համակարգը՝ որպես այդպիսին, իր արդյունավետությունը դեռեւս շատ ոլորտներում՝ աշխատավարձեր, արագագործություն, պետք է վերանայի»,- ասաց Ավինյանը: