ԱՄՆ նախագահ Դոնալդ Թրամփը պաշտպանության նախարարի պաշտոնակատար Պատրիկ Շանահանին ասել է, որ չի ցանկանում պատերազմել Իրանի հետ, հաղորդում է NYT-ը՝ հղում անելով անանուն պաշտոնյաներին: Նրանց խոսքով՝ Թրամփն իր օգնականներին հասկացնել է տվել, որ Թեհրանի վրա ճնշման ավելացումը կարող է հակամարտության հանգեցնել:
Թրամփն այդ մասին հայտարարել է Իրանի հետ հարաբերություններում աճող լարվածության մասին ճեպազրույցի ժամանակ: Ամերիկյան հետախուզության տվյալներով՝ Իրանը հրթիռներ է տեղակայել Պարսից ծոցում ոչ մեծ նավերում, ինչը մտավախություն է առաջացնում, որ Թեհրանը կարող է հարված հասցնել ամերիկացի զինվորականների կամ նրա դաշնակիցների ուղղությամբ:
Հանդիպմանը ներկա պաշտոնյայի խոսքով՝ Թրամփին հետագա գործողությունների մասին որեւէ նոր տեղեկություն չի հաղորդվել, սակայն Թրամփը հստակ ասել է, որ չի ցանկանում պատերազմել Իրանի հետ:
Շվեյցարիա այցի ժամանակ Թրամփն ավելի վաղ պատասխանել էր Իրանի հետ հնարավոր պատերազմի մասին հարցին՝ ասելով. «Հուսով եմ, չի լինի»:
Նախագահը փորձում է մեղմել այն հաղորդագրությունները, որոնց համաձայն՝ իր խորհրդական Ջոն Բոլթոնը եւ պետքարտուղար Մայք Պոմպեոն ցանկանում են պատերազմել Իրանի հետ:
Ավելի վաղ Իրանի ԱԳ նախարար Մոհամմադ Ջավադ Զարիֆը հայտարարել էր, որ այս պահին ԱՄՆ-ի հետ բանակցություններ վարելու հնարավորություն չկա:
Պոմպեոն ավելի վաղ նշել էր 12 քայլ, որոնք պետք է ձեռնարկի Իրանը՝ Միացյալ Նահանգներին բավարարելու համար: իսկ Բոլթոնն ազգային անվտանգության հարցերով խորհրդականի պաշտոնը զբաղեցնելուց առաջ Թեհրանի ռեժիմի փոփոխության կոչ էր արել:
Աղբյուրների խոսքով՝ նախագահը լավ է հասկանում իր վարչակազմի վերջին քայլերը, այդուհանդերձ, իրանական սպառնալիքի լրջությունը վարչակազմի անդամների միջեւ կոշտ դեբատների առիթ է հանդիսացել:
Նշենք, որ անցած շաբաթ Պենտագոնը Թրամփին էր ներկայացրել Մերձավոր Արեւելք 120 հազար զինծառայող ուղարկելու ծրագիրը, այն դեպքում, եթե Իրանը հարձակում գործի ամերիկյան զորքերի վրա կամ արագացնի միջուկային զենքի շուրջ իր աշխատանքը:
