ՀՀ երկրորդ նախագահ Ռոբերտ Քոչարյանի խափանման միջոցը փոխելու եւ նրան ազատ արձակելու դատարանի որոշումից դժգոհ քաղաքացիների ենթը Երեւանի փողոցներում ավարտվեց Ազատության հրապարակում: Ակցիայի մասնակիցներից Ջիվան Աբրահամյանը նշեց, որ վաղը՝ մայիսի 19-ին, ժամը 18-ին նորից հավաքվելու են Ազատության հրապարակում:
«Քայլերթ կանցկացնենք եւ մեր կոչերով մարդկանց ցույց կտանք, որ մենք այսքան չենք, շատ ավելի ավելի շատ ենք: Բոլոր նրանք, որոնք ցանկանում են Ռոբերտ Քոչարյանին կալանավորված տեսնել, վաղը թող միանան մեզ: Իմ առաջարկն է՝ ժամանակ տալ դատարանին, որ մինչեւ երկուշաբթի ժամը 16-ը կալանավորի Ռոբերտ Քոչարյանին»,-ասաց նա: Դրանից հետո ցուցարարները ցրվեցին:
Նշենք, որ այսօր՝ մայիսի 18-ին, Երեւանի ընդհանուր իրավասության դատարանում ՀՀ երկրորդ նախագահ Ռոբերտ Քոչարյանին կալանքից ազատելու որոշումից հետո դատարանի բակում նրա դեմ ակցիա իրականացնող քաղաքացիները քայլերթ են իրականացրել: Նրանք նախ փակել են Մյասնիկյան պողոտան, ապա քայլերթով հասել են Ազատության հրապարակ, որտեղ հանրահավաք են անցկացրել:
Ավելի վաղ NEWS.am-ը հայտնել էր, որ դատարանն այսօր Ռոբերտ Քոչարյանի համար որպես խափանման միջոց է համարել երաշխավորություննը: Նրան ազատելու երաշխավորությամբ հանդես էին եկել Արցախի նախագահ Բակո Սահակյանը և նախկին նախագահ Արկադի Ղուկասյանը:
