Հյուսիսային Կորեան Հարավային Կորեային քննադատել է վերջերս Սեուլում տեղի ունեցած ԱՄՆ-ի հետ բանակցությունների պատճառով, որոնք Փհենյանը գնահատել է որպես արտասահմանյան ուժերից կախվածության քաղաքականության շարունակություն: Այս մասին նշված է «Ուրիմինչժոկիրի» («Միասին մեր ազգի հետ») լրատվական պորտալում հրապարակված մեկնաբանության մեջ:
«Այն փաստը, որ Հարավային Կորեայի իշխանությունները վերջերս ԱՄՆ-ի հետ գաղտնի բանակցություններ են անցկացրել, ընդ որում՝ հայտարարելով, որ խոսքը աշխատանքային խմբի նիստի եւ սերտ համագործակցության մասին է, ցույց է տալիս, որ նրանք պետք է վերջ տան արտասահմանյան ուժերից կախվածության քաղաքականությունը»,- նշված է հոդվածոմ:
Մեկնաբանության հեղինակների կարծիքով՝ «հիմար քայլ է սպասել, որ Հյուսիսի եւ Հարավի հարբերությունների բարելավման պայմաններն ու մթնոլորտը կարող են ստեղծվել արտաքին ուժերից թույլտվություն ստանալու ճանապարհով, որը միայն է՛լ ավելի կձգի կախվածության հանգույցը»:
Ավելի վաղ Հարավային Կորեայի լրատվամիջոցները հայտնել էին ԱՄՆ Պետքարտուղարության Հյուսիսային Կորեայի հարցերով հատուկ ներկայացուցիչ Սթիվեն Բիգենի Սեուլ այցի եւ Հարավի՝ Կորեական թերակղզում խաղաղության եւ անվտանգության հարցերով հատուկ ներկայացուցիչ Լի Դու Հունի հետ հանդիպման մասին: Նրանք նաեւ Հյուսիսային Կորեայի հարցերով ամերիկա-հարավկորեական աշխատանքային խմբի նիստ էին անցկացրել, որն առաջինն էր ԱՄՆ եւ Հյուսիսային Կորեայի առաջնորդների Հանոյի գագաթնաժողովից հետո:
Հիշեցնենք, որ փետրվարի 27-28-ին Հանոյում տեղի էր ունեցել ԱՄՆ եւ Հյուսիսային Կորեայի երկրորդ գագաթնաժողովը, որի ժամանակ կողմերին չէր հաջողվել համաձայնության հասնել: Մի քանի հանդիպումներից հետո, այդ թվում՝ դեմ առ դեմ, ԱՄՆ նախագահ Դոնալդ Թրամփը եւ Հյուսիսային Կորեայի Պետխորհրդի նախագահ Կիմ Չեն Ընը համատեղ փաստաթուղթ չէին ստորագրել:
