Փոխվարչապետ Մհեր Գրիգորյանն ընդունել է Հայաստանում գործող երկու կենսաթոշակային ֆոնդերի կառավարիչներից մեկի՝ «Ամունդի-ԱԿԲԱ Ասեթ Մենեջմենթ» ընկերության գլխավոր բաժնետեր ֆրանսիական Ամունդիի գլխավոր գործադիր տնօրենի տեղակալ, բիզնես մոնիտորինգի եւ հսկողության գծով տնօրեն Բերնար դը Վիթի գլխավորած պատվիրակությանը: Հանդիպմանը ներկա էին նաեւ Ֆինանսների նախարար Ատոմ Ջանջուղազյանը, Աշխատանքի եւ սոցիալական հարցերի նախարար Զարուհի Բաթոյանը եւ Կենտրոնական Բանկի նախագահի տեղակալ Ներսես Երիցյանը:
Ողջունելով հյուրերին՝ փոխվարչապետը շնորհավորել է «Ամունդի-ԱԿԲԱ Ասեթ Մենեջմենթ»-ի 5-ամյա գործունեության առթիվ եւ նշել, որ Հայաստանի Կառավարությունը պատրաստակամ է զարգացնել համագործակցությունը նման վստահելի եւ հեղինակավոր գործընկերոջ հետ:
Մհեր Գրիգորյանն առանձնակի կարեւորել է բարեփոխումների իրականացման գործընթացում թափանցիկ եւ կայուն գործելակերպ ունեցող ընկերությունների մասնակցությունը:
Բերնար դը Վիթը, շնորհակալություն հայտնելով ընդունելության համար, հակիրճ ներկայացրել է ընկերության գործունեությունը եւ գործելակերպը:
Զրուցակիցները համակարծիք են եղել Հայաստանում ֆինանսական շուկայի զարգացման գործում արժեթղթերի շուկայի կայացման կարեւորության հարցում: Հանդիպմանը մասնակիցները շեշտել են հասարակության շրջանում կենսաթոշակային կուտակային համակարգի վերաբերյալ տեղեկացվածության բարձրացման անհրաժեշտությունը՝ համարելով այն առաջնային խնդիր համակարգը զարգացնելու եւ համագործակցությունը խորացնելու հարցում:
Փոխվարչապետ Մհեր Գրիգորյանը հանդիպման ավարտին եւս մեկ անգամ նշել է համագործակցությունն ընդլայնելու Կառավարության ցանկության մասին՝ ընդգծելով, որ համատեղ իրականացվում է շատ պատասխանատու միջոցառում, որն ունի կարեւոր սոցիալական, տնտեսական եւ ֆինանսական ազդեցություն: