Մեքսիկայի Օախակա եւ Տամաուլիպաս նահանգներում տեղի ունեցած հրաձգության ժամանակ սպանվել է 10 մարդ, փոխանցում է «ՌԻԱ Նովոստի»-ն:
Օախակա նահանգի դատախազությունից հայտնել են, որ անհայտ հանցագործները կրակ են բացել մարդկանց խմբի վրա, որոնք Տեուանտեպեկ պարանոցի շրջանում հավաքվել էին ճամփեզրին տեղի ունենալիք հանդիպման համար: Ընդհանուր սպանվել է 6 մարդ՝ 4 կին եւ 2 տղամարդ: Հարձակման պատճառները դեռեւս չեն պարզվել, չեն հայտնաբերվել նաեւ մարդասպանները: Դատախազությունում գործ է հարուցվել մի քանի մարդու սպանության փաստով:
Միաժամանակ, Տամաուլիպաս նահանգում զինվորականները ավտոմեքենաների հետպնդումից հետո Դիաս Օրդաս համայնքում փոխհրաձգություն են սկսել ավազակների հետ: Golfo Pacifico գործակալությունը հայտնում է, որ հետապնդումից հետո հանցագործները հետ են շրջվել եւ զինվորականների հետ մարտի մեջ մտել, սակայն պարտվել են: Սպանվել է տեղի հանցավոր խմբավորման 4 անդամ, վիրավորվել է մեկ զինծառայող:
Վերջին տարիներին Մեքսիկայում բռնության ալիք է բարձրացել, որը մեծ մասամբ պայմանավորված է ԱՄՆ կոկաինի տարանցման վերահսկողության համար կարտելների հակամարտությամբ: 2018 թվականին Մեքսիկայում գրանցվել է սպանությունների ռեկորդային թիվ՝ անվտանգության նախարարությունը հայտնել էր ավելի քան 33,34 հազար սպանության մասին: Այս ցուցանիշը գերազանցել է 2017 թվականի ռեկորդը (31,2 հազար սպանություն):