«WCIT 2019» ՏՏ համաշխարհային համաժողովի պաշտոնական կայքում մեկնարկել է մասնակցության տոմսերի վաճառքը։ Դրանք կարելի է ձեռք բերել միայն առցանց եղանակով։ Տոմսի արժեքը 695 դոլար է, իսկ «վաղ փուլի» գնորդների համար` 395 դոլար։ Գրանցման «վաղ փուլը» կդադարեցվի 1000-րդ տոմսի վաճառքով։
Միջազգային համաժողովի կազմակերպիչ Առաջատար տեխնոլոգիաների ձեռնարկությունների միության, համաժողովի հիմնադիր WITSA-ի անդամների եւ հայաստանյան այլ ընկերությունների ներկայացուցիչների համար նախատեսված են տոմսերի հատուկ արժեքներ։
Երեւանում տեղի ունենալիք համաժողովին ակնկալվում է հանրային եւ մասնավոր ոլորտի ավելի քան 2500 գործիչների մասնակցություն՝ շուրջ 60 երկրից։ Վերջին 10 տարում ՏՏ համաշխարհային համաժողովն առաջին անգամ է տեղի ունենալու Եվրոպայում։ 1,5 ամսում 1500-ից ավելի կազմակերպությունների ու անհատների նախնական գրանցում է տեղի ունեցել։
Նշենք, որ «WCIT 2019» ՏՏ համաշխարհային համաժողովը տեղի կունենա Երեւանում, հոկտեմբերի 6-9-ին։ Համաժողովը հյուրընկալվում է Հայաստանում՝ ՀՀ կառավարության բարձր հովանու ներքո եւ աջակցությամբ։ ՏՏ համաշխարհային համաժողովը հիմնադրել է Տեղեկատվական տեխնոլոգիաների եւ ծառայությունների համաշխարհային դաշինքը։ Համաժողովը կազմակերպում է Առաջատար տեխնոլոգիաների ձեռնարկությունների միությունը։
