Վատթարացնող նորմը կարող է ուժի մեջ մտնել առնվազն 6 ամիս հետո, իսկ ներկրվող ցեմենտի դեպքում 14 հազար դրամի պետական տուրքի սահմանումը հենց վատթարացնող նորմ է ներկրողների համար: Այս մասին այսօր՝ մայիսի 22-ին, ԱԺ տնտեսական հարցերի հանձնաժողովում հայտարարեց «Լուսավոր Հայաստան» խմբակցության պատգամավոր Մանե Թանդիլյանը՝ հավելելով, որ նման քայլ անելով իրենք վատ ազդակ են տալիս տնտեսությանը:
«Սա շատ վատ նախադեպ է: Հետագայում մենք ի՞նչ ենք բացատրելու այն տնտեսվարողներին, որոնք այլ փոփոխության կարիք են ունենալու եւ մենք անընդհատ այդ նորմը ոտնահարելով փորձելու ենք ժամանակից շուտ կիրառության մեջ դնել: Դա շատ վատ հետեւանք է ունենալու մեր տնտեսության համար»,-ասաց Թանդիլյանը:
Ի պատասխան «Իմ քայլը» խմբակցությունից Հայկ Սարգսյանն ասաց. «Ընդհակառակը, ներդրողները սրանից ավելի կխրախուսվեն, որովհետեւ կտեսնեն, որ ԱԺ-ն լսում է իրենց, հետամուտ է լինում: Որովհետեւ այդ նույն գործարարները, որ կանգնած են փակվելու վտանգի առջեւ, նրանք նույնպես ներդրողներ են: Ինչո՞ւ չեք նրանց նայում ներդրողների աչքերով: Մենք այսօր իրականում պաշտպանում ենք մեր ներդրողներին: Սա ազդակ է նրանց համար, որ կառավարությունը, ԱԺ-ն պատրաստ են օրենսդրական դաշտում փոփոխություններով իրենց ներդրումները պահպանել»:
Իր հերթին, տնտեսական զարգացման եւ ներդրումների նախարար Տիգրան Խաչատրյանը նշեց, որ Թանդիլյանի հնչեցրած մտահոգությանը համաձայն է. «Եթե հարկի դրույքաչափ փոխելիս լինեինք, կասեի, որ դեմ եմ 6 ամսից շուտ դեմ եմ նման փոփոխություն անելուն: Շահութահարկի դեպքում անգամ 6 ամիսն է քիչ: Բայց այս դեպքում այնպես չի, որ հարցը նոր է առաջացել, երկու տարի է խոսում ենք»:
