Կան տարբեր կարծիքներ եւ մեկնաբանություններ, թե ինչ է անցումային արդարադատությունը: Խորհրդարանում անցումային արդարադատության մասին անցկացվող լսումներին այս մասին ասաց արդարադատության փոխնախարար Աննա Վարդապետյանը:
Նրա խոսքով՝ կարծքիները տարբեր են, սակայն միջազգային իրավական փաստաթղթերն ասում են, որ դա գործիքների ամբողջություն է, որը նպատակ ունի ապահովել հասարակության անցումը մի ֆորմացիայից մյուսին:
Նա հատուկ ընդգծեց, որ խոսքը բացառապես իրավական գործիքակազմի մասին է՝ ուղղված զանգվածային խախտումների հայտնաբերմանը:
Փոխնախարարն ընդգծեց, որ փորձագետները հաճախ խոսում են անցումային արդարադատության մասին պատերազմների եւ հակամարտությունների հետեւանքների կոնտեքստում, սակայն մոռանում են, որ դա կարող է զանգվածային խաղաղ խախտումների հետեւանք լինել եւ հանգեցնել արժեքների նվազմանը կամ արժեզրկմանը:
Պետությունն ինքն է ընտրում գործիքակազմը, ինչ չափով այն օգտագործել եւ անհրաժեշտություն չկա օգտագործելու գործիքների ամբողջ հավաքածուն:
Աննա Վարդապետյանը նշեց, որ Հայաստանը հարցը դիտարկում է երկու աշխատանքային հարթակներում՝ ՄԱԿ չափանիշներ եւ ԵԽ չափանիշներ:
«Իրավաբանները հաճախ փորձում են տարանջատել այդ կառույցների անցումային արդարադատության վերաբերյալ միջազգային փաստաթղթերը: Կարծում եմ նման մոտեցումը ամբողջական չէ», - նշեց նա:
Էքսկուրս կատարելով դեպի պատմություն, Վարդապետյանը հիշեցրեց, որ ԵԽ-ն եւ Եվրոպական դատարանը ձեւավորվել են անցումային ժամանակաշրջանում:
Նրա խոսքով՝ անցումային արդարադատության նպատակը հաշտեցումն է, այլ ոչ թե առճակատումը: Գործիքակազմի մասին խոսելով նա նշեց վեթինգը՝ ընդգծելով, որ դա գնահատման գործընթաց է, այլ ոչ թե ֆիլտրացիայի, ինչպես հաճախ դա փորձում են ներկայացնել եւ նվաստացուցիչ գործընթաց չի ենթադրում:
