Կիեւի քաղաքապետ Վիտալի Կլիչկոն Facebook-ի իր էջում հրապարակել է կամուրջի ապակե մասի զննության տեսանյութը, որը բացման հաջորդ օրը վնասվել է:
Կլիչկոյի խոսքով՝ նա մասնագետների հետ դիտել է օբյեկտը:
Պարզվել է, որ կամուրջի երկու հատվածներում ճաքել է պաշտպանական ապակե շերտը, ընդ որում կամուրջի հիմնական մասը չի վնասվել:
Կիեւի քաղաքապետը նշել է, որ վնասված տարրերը նախատեսվում է փոխել երկու օրվա ընթացքում:
Կիեւի նոր ապակե հետիոտնա-հեծանվային կամուրջը, որը գտնվում է Ժողովուրդների բարեկամության կամարի եւ «Վլադիմիրսկայա գորկա» այգու միջեւ, բացումից մեկ օր անց ճաքել է: Օբյեկտը շահագործման են հանձնել մայիսի 25-ին՝ քաղաքի օրվա կապակցությամբ:
Կլիչկոն կատարվածը վանդալիզմ է անվանել: Նա նաեւ չի բացառել, որ օբյեկտը կարող էին վնասել հրաձգության արդյունքում: Կատարվածի փաստով քաղաքապետը դիմել է իրավապահ մարմիններին:
Կամուրջի անցման երկարությունը մոտ 212 մ է, այն կառուցված է բետոնից եւ ապակուց: Ծածկույթը գուսասֆալտ է: Մետաղական կոնստրուկցիաների քաշը կազմում է 460 տոննա:
