Կապանի օդանավակայանի ուղեւորային համալիրի շինաշխատանքները գրեթե 60 տոկոսով կատարվել են: Այս մասին, այսօր՝ մայիսի 27-ին, «Իմ քայլը հանուն Սյունիքի մարզի» ներդրումային համաժողովի ժամանակ նշեց Սյունիքի մարզպետի խորհրդական Գոռ Թադեւոսյանը:
Նա նշեց, որ Կապանի օդանավակայանի վերագործարկման նպատակով 2017 թ. Սյունիքի զարգացման եւ ներդրման հիմնադրամը հիմնել է «Սյունիք օդանավակայան» ՍՊԸ-ն, որի մասնակիցներն են «Զանգեզուրի պղնձամոլիբդենային կոմբինատ» բարեգործական հիմնադրամը Սյունիքի զարգացման եւ ներդրման հիմնադրամը: 2017-ի սեպտեմբերին Կապանի համայնքապետարանի եւ «Սյունիք օդանավակայան»-ի միջեւ կնքվել է կոնցեսիոն պայմանագիր, որով նախատեսվում էր վերանորոգել ու վերագործարկել օդանավակայանը:
Թադեւոսյանի խոսքով, նախատեսվում է, որ ուղեւորային համալիրը նախկին 160 քմ-ի փոխարեն կլինի 900 քմ՝ 100 մարդ/ժամ սպասարկման հնարավորությամբ:
«Ուղեւորային համալիրի շինարարական աշխատանքները գրեթե 60 տոկոսով կատարվել են, արդյունքում ունենալու ենք միջազգային ստանդարտներին համապատասխան, հիմնանորոգված թռիչքուղով օդանավակայան, որը հնարավորություն կընձեռի ավելի ծանր օդանավեր ընդունել: Թռիչքուղու ծածկն ամբողջությամբ փոխվում է:
Դեռեւս խորհրդային տարիներին Կապանի օդանավակայանը համարվում էր ԽՍՀՄ տարածքում թռիչքներ ու վայրէջքներ իրականացնելու համար ամենաբարդ օդանավակայաններից մեկը, այդ իսկ պատճառով ներդրվելու է թռիչքա-տեղեկատվական նոր համակարգեր, որոնք հնարավորություն են տալու եղանակային ոչ բարենպաստ պայմաններում իրականացնել թռիչքներ եւ վայրէջքներ»,-ընդգծեց մարզպետի խորհրդականը՝ հավելելով, որ ընդհանուր նախատեսվում է իրականացնել 2․3 մլրդ ՀՀ դրամի ներդրում, որից 800 մլն դրամի ներդրումն արդեն իրականացված է:
Գոռ Թադեւոսյանը ներկայացրեց 19 տեղանոց չեխական արտադրության L 410 օդանավը՝ նշելով, որ այն իրականացնելու է Երեւան-Կապան-Երեւան չվերթները. «Օդանավն այժմ Հայաստանում է՝ Զվարթնոց օդանավակայանում: Օդանավի անձնակազմը վերապատրաստված է Չեխիայի Հանրապետությունում: Պարոն վարչապետ, հարգելի հյուրեր հոյւս ունենք, որ մոտ ապագայում Սյունիք կայցելեք արդեն օդանավով»:
