Հայաստանի սրընթաց զարգացող տեղեկատվական տեխնոլոգիաների ոլորտի գաղտնիքներից մեկը տաղանդավոր, երիտասարդ եւ եռանդուն հայ ՏՏ մասնագետներն են: Այս կարծիքը կիսում է նաեւ DISQO ստարտափի համահիմնադիր եւ տեխնիկական տնօրեն Դրո Քոչարյանը:
NEWS.am- ի հետ զրույցում Դրո Քոչարյանը պատմեց, որ արդեն երկրորդ անգամ է գալիս Երեւան հայաստանյան գրասենյակի հիմնադրման 6 ամիսների ընթացքում։
Նրա խոսքով, Հայաստանի մասնագետներն ունեն շատ բարձր պոտենցիալ: Այս մասին վկայում է այն փաստը, որ ընկերությունը պլանավորված մեկ տարվա փոխարեն, վեց ամսվա ընթացքում հասցրել է արդեն ներգրավել 30 ավագ մասնագետների: «Այժմ էլ շարունակում ենք փնտրել նոր կադրեր: Թիմի աճի նման տեմպի գաղտնիքը մեր կողմից կիրառած ժամանակակից բարձր տեխնոլոգիաներն են, որ գրավում են ավագ մասնագետներին», - պատմում է Քոչարյանը, որի ընկերությունն աշխատում է սեփական պրոդուկտի մշակման վրա՝ սպառողներից ուղղակիորեն (first-hand) հավաքագրած ստույգ տվյալներ է տրամադրում աշխարհի խոշորագույն հետազոտական ընկերություններին:
Այս ընթացքում ընկերության հայաստանյան թիմը նաեւ վերապատրաստում է անցել DISQO –ի Լոս Անջելեսում գտնվող գլխամասում:
Քոչարյանի կարծիքով, Հայաստանում գրասենյակ ունենալու առավելությունը հարուստ աշխատաշուկան է: Ինչ վերաբերում է թերություններին, նա կարողացավ նշել միայն ժամային տարբերությունը, որը աշխատանքի համար կարող է որոշակի պրոբլեմներ ստեղծել:
Ընկերությունում, որն արդեն հասցրել է տեղափոխվել ավելի մեծ գրասենյակ, հպարտ են, որ կարող են աճելու եւ զարգանալու միջավայր ստեղծել հայ մասնագետների համար՝ կանխելով նրանց արտահոսքը երկրից:
Ստարտափի համահիմնադիրը նկատեց, որ Հայսատանի ՏՏ ոլորտը յուրահատուկ է նրանով, որ բոլորն ուրախ են տեսնելու մյուսի հաջողությունները եւ ձեռքբերումները: «Հայաստանում իրոք շատ են տաղանդավոր մասնագետները, բայց ամենակարեւորը մեր գործում նոր բան սովորելու ցանկությունն ու նոր մարտահրավերներ նետելն է»,- նշեց նա: