Այս պահին 100 կմ ճանապարհահատված գտնվում է շինարարության փուլում, եւս 97,5 կմ-ն գտնվում է մրցույթի տարբեր փուլերում: Այս մասին, այսօր՝ մայիսի 30-ին, կառավարության նիստում նշեց Տնարսպորտի, կապի եւ ՏՏ փոխնախարար Բագրատ Բադալյանը:
Նա ժպիտով տեղեկացրեց, որ այս շաբաթ հայտարարվել է դեպի Սիս տանող ճանապարհահատվածի շինարարության մրցույթը, որի բացումը կլինի հունիսի 12-ին:
Վարչապետ Նիկոլ Փաշինյանը ծիծաղելով արձագանքեց. «Մրցույթի բացումը, ոչ թե ճանապարհի: Զգույշ եղեք, թե չէ էդ երեխեքն էլի ասելու են՝ էլի խաբեցին մեզ: Ձեւակերպումները պետք է ճշգրիտ լինեն»:
Վարչապետի խոսքով, ճանապարհների շինարարությունն ունի հոգեբանական նշանակություն երկրում մթնոլորտի, մարդկանց տրամադրության վրա. Մենք պետք է հնարավորինս արագ տեմպերով եւ որակի մասին չմոռանալով ճանապարհները բերենք բարձր մակարդակի»:
Ավելի վաղ NEWS.am-ը հայտնել էր, որ կառավարության 23-ի նիստում ՀՀ վարչապետ Նիկոլ Փաշինյանը կառավարության անդամների ուշադրությունն էր հրավիրել Սիս գյուղի ճանապարհի վերաբերյալ երեխաների բողոքին, որի տեսանյութը լայն տարածում էր գտել:
«Սիս գյուղի երեխեքը հարցազրույց են տալիս, ասում են՝ «Նիկոլն եկավ, խոստացավ, «գլխառադ» արեց ու գնաց»: Այդ ճանապարհն ի՞նչ եղավ, ինչի՞ չենք սարքում, երեխեքը բողոքում են, սենց չեղավ»,-ասել էր վարչապետ Նիկոլ Փաշինյանը։
ՀՀ տարածքային կառավարման եւ զարգացման նախարար Սուրեն Պապիկյանը պատասխանել էր, որ երեխաների բարձրացրած հարցը հաշվի առնելով՝ իրենք ասֆալտը կանեն. «Նախագիծն արդեն ուղարկել ենք, ուղղակի կարող է կարիք լինել մեկ անձից գնելու միջոցով անել, որպեսզի արագանա պրոցեսը»։