Թուրքիային ռուսական Ս-400 զենիթահրթիռային համակարգեր գնելու դեպքում ամերիկյան պատժամիջոցներ են սպառնում, որի արդյունքում երկրի առանց այդ էլ թույլ արժույթն ու տնտեսությունը խոցելի կդառնան, և հարց կբարձրացվի ՆԱՏՕ-ում և տարածաշրջանում Թուրքիայի դիրքի մասին, գրում է Reuters-ը:
Եթե առաջիկա շաբաթներին որոշում չընդունվի, եւ ԱՄՆ-Թուրքիա լարվածությունը շարունակի աճել, ապա դա հարված կհասցնի դաշնակիցների միջեւ առեւտրին, եւ կշարունակվի Թուրքիայի ռեցեսիան: Թուրքիան կմնա առանց ամերիկյան F-35 կործանիչների, ինչպես նաեւ կվերագնահատվի նրա դերը ՆԱՏՕ-ում:
«Այդ հարցը շատ բարդ է լուծել, քանի որ եւ՛ ամերիկացի, եւ՛ թուրք պաշտոնյաները աշխարհաքաղաքական հավասարակշռության արտացոլում են տեսնում: Պատժամիջոցները լուրջ ազդեցություն կունենան Թուրքիայի վրա, սակայն, հավանաբար, բեկումնային չեն լինի ԱՄՆ-ի հետ հարաբերություններում»,- ասել է Օքսֆորդի համալսարանի միջազգային հարաբերությունների եւ քաղաքականության բաժնի փորձագետը:
Հիշեցնենք, որ Ս-400-ների մատակարարումը Թուրքիա կարող է հետաձգվել մինչեւ հունիս:
Նշենք, որ Թուրքիայի եւ Միացյալ Նահանգների միջեւ լարվածություն էր առաջացել Ս-400-ների հարցով բանակցությունների առաջին ամիսներին: Վաշինգտոնը սպառնում է հարցականի տակ դնել Թուրքիայի դերն ամերիկյան F-35 կործանիչների ծրագրում եւ պատժամիջոցներ սահմանել: