Հինգ մարդ է տուժել Ջուդեկա վենետիկյան ջրանցքում կրուիզային նավի եւ զբոսաշրջային շոգենավի բախման հետեւանքով, հաղորդում է ՌԻԱ Նովոստի-ն՝ հղում անելով AGI տեղեկատվական գործակալությանը:
Վթարը տեղի է ունեցել շաբաթ առավոտյան, երբ, նախնական տվյալներով, քարշականավերը չեն հասցրել մոտենալ վնասվածքի հետեւանքով իր ուղղությունը կորցրած նավին: Հոսանքի արդյունքում այն հասել է նավահանգստին, որտեղ կայանված էր զբոսանավը: Բախման հետեւանքով փոքր նավում տուժել է չորս, իսկ կրուիզային նավում՝ մեկ մարդ: Մի շարք ուղեւորներ հայտնվել են ջրում:
Վենետիկյան նավահանգստի ղեկավարությունը կատարում է շոգենավի ուղեւորների տարհանում, դեպքի վայր են ժամանել ոստիկանները, փրկարարներն ու հրշեջները: