2016-ի ապրիլյան իրադարձությունների խորհրդարանական քննիչ հանձնաժողովը ստեղծվել է ընդդիմախոսների վրա քաղաքական ճնշում գործադրելու համար։ Այսպիսի կարծիք է հայտնել քաղաքագետ Աղասի Ենոքյանը հունիսի 5-ին լրագրողների հետ հանդիպման ժամանակ։
Ենոքյանի կարծիքով՝ հանձնաժողովի գործունեությունը չի սահմանափակվի տեղեկատվության հավաքմամբ։ «Եվ թե ինչ հարցերի է պատասխանելու հանձնաժողովը՝ այնքան էլ պարզ չէ։ Եթե խոսքն այն մասին է, թե ով է սկսել պատերազմը, պատասխանն ակնհայտ է՝ Ադրբեջանը։ Եթե խոսքն այն մասին է, որ կարող էին ավելի լավ հակադարձել՝ դրա համար փորձագիտական, այլ ոչ թե խորհրդարանական հանձնաժողով է պետք։ Ինչպես ասաց պաշտպանության նախկին նախարար Սեյրան Օհանյանը, այդ մարդիկ անգամ չեն ծառայել, ինչպե՞ս կարող են գնահատել զինվորականների գործողությունները։ Հարազատներին հրավիրելու մասին հայտարարություններն առհասարակ հասկանալի չեն։ Ավելի շուտ, դա պատրվակ է դժգոհություն ու ճնշում արտահայտելու հարթակի ստեղծման համար, այդ թվում Արցախի իշխանության վրա»,- նշել է Ենոքյանը՝ ավելացնելով, որ Փաշինյանն օգտագործում է բոլոր մեթոդները Արցախի իշխանությունների վրա ճնշում գործադրելու համար, եւ դա միջոցներից մեկն է։
Միաժամանակ, դա գեներալիտետի եւ բանակի հերթական թափահարումն է։ Ծանր պայմաններում ծառայության համար շնորհակալության փոխարեն՝ դժգոհություններ եւ կշտամբանք, ինչը չի կարող չանդրադառնալ բանակի մարտունակության վրա, ասում է Ենոքյանը։ Ընդ որում՝ նա հիշեցրել է, որ այդ իրադարձությունների կարեւոր մասնակիցներից մեկը նշանակվել է հենց Փաշինյանի խորհրդական, թեեւ Սերժ Սարգսյանի օրոք ազատված էր։ Ենոքյանի կարծիքով, եթե հետաքննությունն անցկացվի էլ, պետք է դա անել փակ ռեժիմով, մանավանդ որ ավելի վաղ արդեն հայտարարվել էր՝ 800 հեկտարի հանձնումը թելադրված էր մարտավարական անհրաժեշտությամբ։ «Չի կարող ժողովուրդը հրապարակում լուծել՝ դա մարտավարական լուծո՞ւմ էր, թե՞ ինչ-որ մեկի սխալը»,- ընդգծեց Աղասի Ենոքյանը՝ ավելացնելով, որ Սեֆիլյանը չէ՞ որ խոստացել է ազատագրել, հիմա նրան Սերժ Սարգսյանը չի խանգարում։