«Մարտի 1-ի» զոհերից Զաքար Հովհաննիսյանի սպանության համար ձերբակալված ՀՀ ոստիկանության զորքերի հրամանատարի տեղակալ, շտաբի պետ Գեղամ Պետրոսյանն ինձ վրա դրական տպավորություն է թողել։ Այս մասին այսօր՝ հունիսի 5-ին, լրագրողների հետ զրույցում ասաց ՀՀ ոստիկանապետ Վալերի Օսիպյանը։
«Նա դրական տպավորություն է թողել ինձ մոտ, իր գործառույթները բարեխիղճ կատարել է, թե հիմա ինչն ոնց է, նախաքննությամբ պարզ կլինի, եթե մեղավոր է, պետք է պատասխան տա»,–ասաց նա։
Օսիպյանը նշեց, որ Գեղամ Պետրոսյանի ձերբակալության մասին տեղեկացել է մամուլից։
«Անկախ ամեն ինչից եթե նախաքննությամբ կպարզվի, կհիմնավորվի մեղքը, ով ուզում է լինել, պետք է պատասխանատվություն կրի»,–շեշտեց ոստիկանապետը։
Հարցին՝ հնարավոր է ոստիկանության համակարգից նաեւ այլ անձինք ձերբակալվեն, Օսիպյանը ոչինչ չբացառեց. «Եթե պարզվի, որ ես՝ գնդապետ Օսիպյանը լինելով ՀՀ ոստիկանության պետ, մեղադրվեմ որեւէ հարցում, թող պատասխան տամ օրենքի սահմաններում»։
Լրագրողները հետաքրքրվեցին՝ հնարավոր էր Գեղամ Պետրոսյանը կարող էր առանց հրահանգի կատարեր այն գործողությունները, որում նրան կասկածում են, Օսիպյանը վկայակոչեց «Ոստիկանության մասին» օրենքը, որում հստակ սահմանված է երբ կարող է ոստիկանությունը գործխադրել զենք եւ երբ է արգելվում։
Երեկ Հատուկ քննչական ծառայությունը հաղորդագրություն է տարածել 2008 թվականի մարտի 1-ի դրությամբ ՀՀ ոստիկանության զորքերի հրամանատարի տեղակալ, շտաբի պետ Գեղամ Պետրոսյանի ձերբակալության մասին, ով կասկածվում է 10 զոհերից մեկի՝ Զաքար Հովհաննիսյանի սպանության համար:
