Հայաստանում հեղափոխությունից հետո 150 հազար մարդ կօգտվի կառավարության նախաձեռնած եւ բանկերի կողմից իրականացվող փոփոխություններից, որոնց շնորհիվ կմաքրվեն վարկային վատ պատմությունները, կչեղարկվեն տուգանքները եւ այլն: Այս մասին հունիսի 5-ին խորհրդարանական մշտական հանձնաժողովների համատեղ նիստում 2018 թվականի պետական բյուջեի կատարողականի քննարկումների ժամանակ ասաց Հայաստանի Կենտրոնական բանկի նախագահ Արթուր Ջավադյանը:
Նրա խոսքով՝ գրեթե 21 հազար մարդ բանկերում կուտակված տուգանքներից ազատվել է:
«Մոտ 126 հազար մարդիկ, որոնք մինչեւ 50 հազար դրամի փոխառություն են ունեցել, ազատվել են բանկային վատ պատմությունից եւ հանվել են «սեւ ցուցակից»»,- պարզաբանեց Ջավադյանը:
Այս հայտարարությունից հետո «Բարգավաճ Հայաստան» կուսակցության պատգամավոր Սերգեյ Բագրատյանը հայտարարեց, որ ոչ մի կերպ չի կարողացել գտնել այնպիսի մարդու, որն օգտվել է նման արտոնությունից:
Ի պատասխան՝ Կենտրոնական բանկի նախագահը նշեց, որ այդ ամենն ավտոմատ տեղի չի ունենա, քանի որ մարդիկ իրենք պետք է գնան բանկ, վարկը կոնվերսիայի ենթարկեն եւ կազմեն վարկի մարման ժամանակացույց:
