Հայաստանում այսօր գոյություն ունի կարգավորում, որի համաձայն, հիփոթեքային վարկի միջոցով կառուցապատողից բնակարան գնելու դեպքում, վարկի տոկոսները կարող են մարվել եկամտահարկը վերադարձնելու միջոցով, սակայն որոշ սահմանափակումներով:
Հունիսի 7-ին տնտեսական հարցերի եւ ֆինանսավարկային եւ բյուջետային հարցերի մշտական խորհրդարանական հանձնաժողովների համատեղ նիստում 2018 թվականի պետական բյուջեի կատարման հաշվետվության քննարկմանն այս մասին ասաց էկոնոմիկայի նախարար Ատոմ Ջանջուղազյանը՝պատասխանելով պատգամավորների հարցին, թե արդյոք նրանք մտադիր են սահմանափակել այդ կարգավորումը:
Նախարարը պարզաբանեց, որ տվյալ կարգավորումը ներդրվել է տնտեսական եւ սոցիալական աջակցության ցուցաբերման նպատակով,սակայն ժամանակի ընթացքում քաղաքացիները սկսել են դա չարաշահել:
Ջանջուղազյանը նշեց, որ շատերը մեծ բնակարաններ են գնում եւ այդ դեպքում տվյալ կարգավորման սոցիալական նպատակաուղղվածությունը փաստացի վերացվում էր, իսկ պետբյուջեից հատկացված միջոցները ոչ կարիքավոր ընտանիքներին էին հատկացվում:
Ընդ որում նախարարն այդպես էլ չպատասխանեց հարցին, թե պատրաստվում են արդյոք նրանք սահմանափակել կամ ընդհանրապես հրաժարվել այդ մեխանիզմից: Սակայն նա չբացառեց, որ նման սահմանափակումները ապագայում կարող են կիրառվել:
