Մակնշման ինստիտուտի ներդնումը թույլ տվեց կտրուկ կրճատել «ստվերը»: Հունիսի 7-ին տնտեսական հարցերի եւ ֆինանսավարկային եւ բյուջետային հարցերի մշտական խորհրդարանական հանձնաժողովների համատեղ նիստում 2018 թվականի պետական բյուջեի կատարման հաշվետվության քննարկմանն այս մասին ասաց Պետական եկամուտների կոմիտեի նախագահ Դավիթ Անանյանը՝ պատասխանելով «Իմ քայլը» դաշինքից պատգամավոր Եղիշե Սողոմոնյանի հարցին:
Նրա խոսքով, առանձին ոլորտներում նրանք նույնիսկ մինչեւ 60 տոկոս ստվերային տնտեսության կրճատում են արձանագրել: «Հետեւաբար, այն աննշան ծախսերը, որոնք մենք իրականացնում պետական բյուջեից մակնշումների ձեռքբերման համար միանշանակ արդարացնում են իրենց», - վստահեցրեց Անանյանը:
ՊԵԿ նախագահը ընդգծեց, որ մակնշման հարցով որեւէ վերանայում չի լինի, եւ անգամ հակառակը, հսկողության գործիքները կուժեղացվեն եւ խստացվեն, քանի որ աշխարհը, ըստ նրա, հենց այդ ճանապարհով է գնում: