Ռուսական Ս-400 զենիթահրթիռային համալիրների տեխնիկական պարամետրերը թույլ չեն տալիս դրանք օգտագործել F-35 կործանիչ-ռմբակոծիչների հետ միասին, ընդ որում՝ Ս-400-ը գաղտնազերծում է այս օդանավի հնարավորությունները, հայտարարել է Եվրոպայում ՆԱՏՕ-ի Միացյալ ԶՈՒ գլխավոր հրամանատար Թոդ Ուոլթերսը, փոխանցում է «Ինտերֆաքսը»:
«Դուք չեք կարող Ս-400-ն օգտագործել F-35-ի մերձակայքում. դրանք (Ս-400-ը եւ F-35-ը) չեն կարող միմյանց հետ «խոսել», իսկ ինչ կփորձեն անել այս 2 համակարգերը,- իհարկե՝ Ս-400-ն ընդդեմ F-35-ի,- կփորձի բացահայտել F-35-ի ներուժը: Ձեզ ասեմ, որ մենք շահագրգռված չենք F-35-ի հնարավորությունների մասին տեղեկություններ հայտնել... ռուսներին»,- նրա խոսքն է մեջբերել ԱՄԷ-ում հրատարակվող The National անգլիալեզու պարբերականը:
Բրատիսլավայում GLOBSEC կազմակերպությունում հանդիպման ժամանակ Ուոլթերսը նշել է, որ Թուրքիայի եւ ՆԱՏՕ-ի նրա դաշնակիցների հարաբերություններում ավելի շատ ընդհանրություններ կան, քան տարբերություններ:
Ամերիկյան կողմը նախկինում բազմիցս հայտարարել է, որ մտադիր չէ Թուրքիայի մոտ թողնել F-35 կործանիչ-ռմբակոծիչները, եթե Անկարան դրա հետ միաժամանակ Ռուսաստանից Ս-400-ներ ստանա: Այսպես ԱՄՆ Պետքարտուղարության ներկայացուցիչ Մորգան Օրտագուսի խոսքով, Վաշինգտոնը կարող է դադարեցնել Թուրքիայի մասնակցությունը F-35 ծրագրին եւ Ռուսաստանից Ս-400-ի գնման պատճառով Անկարայի դեմ պատժամիջոցներ կիրառել CAATSA օրենքի շրջանակում: