Առաջարկվում է 2 տոկոսային կետով իջեցնել եկամտահարկը եւ մտցնել միասնական եկամտահարկ՝ սկսած 23 տոկոսից 2020-ին, իսկ հետո երեք տարվա ընթացքում անընդհատ իջեցնել տոկոսադրույքը մինչեւ 20 տոկոս։ Այս մասին ՀՀ Ազգային ժողովի արտահերթ նիստում, Հարկային օրենսգրքում փոփոխությունների քննարկման ընթացքում, հունիսի 7-ին ասել է ֆինանսների փոխնախարար, հիմնական զեկուցող Արման Պողոսյանը։
Ընդ որում՝ նրա խոսքով, զուգահեռ նախատեսվում է վերականգնել սոցիալական վճարների մասնակիցների բաժինը եւ նախկին 5-5 տոկոս հարաբերակցությունը սոցիալական վճարների մասնակիցների եւ պետության միջեւ։ Բացի այդ, ինչպես նշել է փոխնախարարը, դրան զուգահեռ նախատեսվում է իրականացնել եկամտահարկի իջեցում։ «Դա ենթադրում է հարկային մուտքերի որոշակի կորուստ։ Մասնավորապես, եկամտահարկից վնասը գնահատվել է 27,5 մլրդ դրամ, իսկ շահութահարկից՝ 11 մլրդ դրամ»,- պարզաբանել է Պողոսյանը։ Պողոսյանը նշել է, որ կառավարությունը չի ծրագրում բարձրացնել ավելացված արժեքի հարկը, որովհետեւ ըստ էության դա ռեգրեսիվ հարկ է, որը «հարված կհասցնի աղքատության առումով»։