Արդարադատության նախարարության և պարոն Զեյնալյանի հետ կապված «Իմ քայլը» խմբակցությունում որոշակի մտահոգություններ և անհանգստություններ հնչել են։ Այս մասին այսօր՝ հունիսի 7-ին, լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը` անդրադառնալով Արտակ Զեյնալյանի հրաժարականին։

Հարցին, թե ինչի հետ են կապված եղել այդ մտահոգությունները, Մակունցը պատասխանեց. «Առանձին աշխատանքների հետ կապված, դատաիրավական համակարգում բարեփոխումների հետ կապված»։

Մակունցի խոսքով՝ իրենց այդ մտահոգությունները վարչապետին կամ փոխվարչապետերին չեն ներկայացրել. «Մենք հարցը քննարկել ենք խմբակցության նիստերից մեկի ժամանակ։ Ոչ թե քննարկել ենք, այլ հնչել է մտահոգություն, հատկապես այն լայնածավալ անվստահության ակցիայից հետո, որը տեղի է ունեցել ՀՀ քաղաքացիների կողմից, այս համատեքստում հնչել էին այդ մտահոգությունները»։

Ի պատասխան այն տեղեկություններին, թե «Իմ քայլը» խմբակցության Վլադիմիր Վարդանյանի անուն է շրջանառվում արդարադատության նախարարի պաշտոնում, Մակունցն ասաց. «Իմ  ունեցած տեղեկություններով՝ դա իրականությանը չի համապատասխանում»։

Հիշեցնենք, որ այսօր Արտակ Զեյնալյանը հայտարարել է հրաժարականի մասին։

Հիշեցնենք, որ վարչապետ Նիկոլ Փաշինյանի կոչով մայիսի 20–ին դատարանների մուտքերը արգելափակելուց հետո «Իմ քայլի» նիստերից մեկում, ըստ մամուլի հրապարակումների, պատգամավորները դժգոհություն էին հայտնել Արտակ Զեյնալյանից՝ պնդելով, որ ԲԴԽ–ն ու ՍԴ–ն իրենք առաջարկում են ցրել, իսկ Զեյնալյանն ասում է, որ դա հնարավոր չէ։