Հարկային օրենսգրքի փոփոխություններին կողմ չենք քվեարկելու։ Այս մասին այսօր՝ հունիսի 7-ին, լրագրողների հետ զրույցում ասաց ՀՀ ԱԺ «Բարգավաճ Հայաստան» խմբակցության ղեկավար Գագիկ Ծառուկյանը։

«Այդտեղ շատ կան խնդիրներ, հիմնական պրոբլեմներ։  Այսօր եթե կան լավ բաներ, մենք կողմ ենք քվեարկելու։ Բայց նաև կան վատ բաներ, օրինակ համահարթեցմանը մենք դեմ ենք քվեարկելու։ Սա լիարժեք անարդարացի է՝ այսօր ժողովրդի հաշվին բյուջեի գումարն ավելացնելն ընդունելի չէ։ Եթե մենք ունենք 230 հազար անձ, որը ստանում է 65 հազար, 390 հազարը՝ 150 հազարը, 130 հազարը՝ 200 հազար։ Ընդհանրապես ունենք 800 հոգի, որ ստանում է 2 մլն դրամ աշխատավարձ:  800 հոգու համար պե՞տք է համահարթեցում լինի, որ 600 հազար մարդու հաշվին գումար լինի»,–նշեց նա:

Ծառուկյանը վկայակոչում է Գերմանիայի օրինակը, որ եթե անձը ստանում է 9000 եվրո, ապա նա չի հարկվում.

«Ես կխնդրեի՝ հարկային օրենսգիրքը վերանայողները, բարեփոխումներ անողները բարի թող լինեն համաշխարհային մակարդակով նայեն։ Օրինակ Գերմանիայում, եթե անձը ստանում է 9000 եվրո, ապա նա չի հարկվում»: Նրա խոսքով՝ Հայաստանում ևս պիտի օրենք ընդունեն, որ մինչև 150 հազար դրամ աշխատավարձ ստացող անձինք չհարկվեն:

Գագիկ Ծառուկյանն ասաց, որ դեմ են քվեարկելու հարկային օրենսգրքի փաթեթին նաև համահարթեցման համար:

Հարցին՝ եթե օրինագիծն, այնուամենայնիվ, ընդունվի, իր վրա կազդի՞, նա բացասական պատասխանեց. «Իմ վրա ինչ ուզում են անեն, ոչ մի ձևով չի ազդելու»։