Կառավարությունը չի առաջարկում ԱԱՀ բարձրացում, քանի որ իր էությամբ դա ռեգրեսիվ հարկ է եւ ցանկացած տոկոսային բարձրացում աղքատության խորցամման ուղղված ուղիղ հարված է: Հունիսի 7-ին ԱԺ արտահերթ նիստում Հարկային օրենսգրքում փոփոխություններ կատարելու մասին օրինագծի քննարկման ժամանակ այս մասին ասաց ֆինանսների փոխնախարար, հիմնական զեկուցող Արման Պողոսյանը:
Այս պայմաններում, ըստ նրա, օպտիմալ լուծումը, որը գտել է կառավարությունը, ակցիզային հարկի որոշակի բարձրացումն է: «Սա հիմնավորվում է նրանով, որ նման երկրներում փորձի ուսումնասիրության ժամանակ մենք եկել ենք այն եզրակացության, որ մեր երկրում ակցիզային հարկի բեռը «թույլ» է որոշ ապրանքատեսակների առումով», - ասաց Պողոսյանը:
Նա նշեց, որ նախատեսվում է հրաժարվել ադվալորային ակցիզային դրույքաչափից, քանի որ գոյություն ունեցող ակցիզային հարկման համակարգը ենթադրում է ոչ միայն ներկրողի եւ տեղական արտադրողի միջեւ հարկային բեռի անհավասար բաշխում, այլեւ տարբեր գնային կատեգորիաների ապրանքների միջեւ, քանի որ տվյալ պահին հարկը հաշվարկվում է ելնելով ապրանքի արժեքից:
«Բացի այդ ստացվում է, որ մենք միաժամանակ կիրառում ենք եւ ԱԱՀ եւ ակցիզային հարկ, ինչը նույնպես անընդունելի է միջազգային պրակտիկայում», - ընդգծեց նա: