Հայաստանի մայրաքաղաքը, ինչպես նաեւ Շիրակի եւ Արագածոտնի մարզերը այս տարվա սեպտեմբերից կանցնեն ընդհանուր ներառական կրթական համակարգին: Այս մասին հունիսի 12-ին Գիտության, կրթության, մշակույթի, սփյուռքի, երիտասարդության եւ սպորտի, ինչպես նաեւ ֆինասավարկային եւ բյուջետային հարցերով խորհրդարանական մշտական հանձնաժողովների համատեղ նիստում 2018 թվականի պետական բյուջեի կատարողականի քննարկման ժամանակ ասաց կրթության, գիտության, մշակույթի եւ սպորտի նախարար Արայիկ Հարությունյանը:
Նախարարի խոսքով՝ երկիրն աստիճանաբար անցնում է Հայաստանի բոլոր մարզերում ընդհանուր ներառական կրթական համակարգին: «Անցյալ տարի մենք այս անցումն իրականացրել ենք Արմավիրի մարզում»,- հիշեցրեց Հարությունյանը:
