Նորվեգական Frontline ընկերության Front Altair լցանավը, որը հինգշաբթի հարձակման է ենթարկվել ԱՄԷ-ի Էլ Ֆուջայր էմիրության ափերի մոտ, ջրասույզ է եղել, հայտնում է Al Mayadeen-ն:
NHK հեռուստաալիքը հայտնում է, որ Kokuka Courageous լցանավը պատկանում է ճապոնական Kunihana Sangyo տրանսպորտային ընկերությանը: Նրա տեղեկություններով՝ նավում մոտ 20 նավաստի կա, որոնք Ֆիլիպինների քաղաքացիներ են: Լցանավի երկարությունը կազմում է 170 մետր, ջրատարողությունը՝ 19 հազար տոննա:
Ճապոնիայի էկոնոմիկայի, առեւտրի եւ արդյունաբերության նախարար Հիրոսիգե Սեկոն հայտարարել է, որ գերատեսչությունում արտահերթ խորհրդակցություն է հրավիրվել՝ կապված Օմանի նեղուցում հարձակման տեղեկության հետ: Նախարարի խոսքով՝ երկու լցանավում էլ Ճապոնիայի հետ կապված բեռ է եղել:
Ավելի վաղ իրանական Press TV-ն հայտնել էր, որ հինգշաբթի Օմանի նեղուցում 2 նավթային լցանավ են հարձակման ենթարկվել: Նավերի տեղադրության վայրի շրջանում լսվել են պայթյունների ձայներ: Պակիստանի եւ Օմանի ծովային նավահանգիստները լցանավերի անձնակազմերից աղետի ահազանգ են ստացել:
Միաժամանակ, արաբական լրատվամիջոցները հայտնում են, որ նավերը ենթարկվել են տորպեդային հարձակման: Լցանավերի վրա հրդեհը շարունակվում է: