Մարդիկ սովորաբար մեքենաները գնում են նրանց սեփականատերերից, ինչը չի կարելի ասել1968 թվականի Ford Mustang-ի ձեռքբերման մասին, որում շփոթված գնորդը հայտնաբերել է նախորդ սեփականատիրոջ աճյունը, հաղորդում է Fox News-ը:
Արտառոց գնման պատմությունը ներկայացրել է այդ ապրանքանիշի սիրահարների կայքը:
Մեքենան 40 տարվա ընթացքում ժանգոտում էր Ֆլորիդա նահանգի մարագում, երբ մահացած սեփականատիրոջ՝ Ջեյմսի ընտանիքը համաձայնել էր այն վաճառել մահացածի լավագույն ընկերոջը՝ Բրյուսին: Նա մքենան տարել էր Հյուսիսային Կառոլինա:
Ավելի ուշ Բրյուսի մոտ ֆինանսասկան խնդիրներ էին սկսվել եւ նա որոշել էր մեքենան վաճառել հնահավաք Զայք Թեյլորին:
Սակայն երբ Թեյլորը սկսել էր նայել մեքենան, սրահում աճյունով տարա էր հայտնաբերել եւ հարցրել Բրյուսին, թե ինչ է դա: Բրյուսը հանգիստ ասել էր, որ դա առաջին սեփականատեր Ջեյմսի աճյունն է, որը վաճառվում է մեքենայի հետ:
Թեյլորը երկար ժամանակ տարակուսել էր, սակայն վերջ ի վերջո 7 հազար դոլարով գնել էր մեքենան: Ավելի ուշ նա ավելի թանկ գնով այն վաճառել էր սրահին՝ 23 հազար դոլարով:
