ԱՄՆ-ը չի կարող «անխելք» լինել՝ Իրանի հետ հարաբերություններում աճող լարվածության ֆոնին: Այս մասին հայտարարել է ԱՄՆ Ներկայացուցիչների պալատի խոսնակ Նենսի Փելոսին, հաղորդում է AP-ը:
Նրա խոսքով՝ ինքը չի կարծում, թե նախագահ Թրամփը ցանկանում է պատերազմել Իրանի հետ: ԱՄՆ-ը, ըստ Փելոսիի, պետք է պաշտպանի իր շահերը եւ չի կարող «անխելք» լինել:
Ավելի վաղ Իրանի Իսլամական հեղափոխության պահապանների կորպուսը հայտնել է, որ այսօր Իրանի օդային տարածքում խոցել է ամերիկյան անօդաչու թռչող սարքը: ԱՄՆ-ում պնդում են, որ այն գտնվել է միջազգային օդային տարածքում: Իրանի ԱԳՆ խոսնակ Աբբաս Մուսավին քննադատել է Իրանի տարածք ամերիկյան ԱԹՍ-ի ներխուժումը: Մուսավին իր հայտարարության մեջ բողոք է հայտնել երկրի օդային տարածքի խախտման «ագրեսիվ եւ սադրիչ» քայլերի դեմ: Նա նշել է, որ Իրանի սահմանը խախտելու պատասխանատվությունն ընկած է ներխուժում իրականացրած երկրի վրա: