Թբիլիսիի խորհրդարանի մոտ հարյուրավոր ցուցարարներին ցրելու համար Վրաստանի ՆԳՆ-ն կիրառել է ջրցաններ, ռետինե փամփուշտներ, զրահամեքենա, հրշեջ մեքենա եւ լուսաձայնային նռնակներ, փոխանցում է «Նովոստի Գրուզիան»:
Հիշեցնենք, որ ավելի վաղ երկրի ՆԳՆ-ն հայտարարել էր, որ ցույցը օրենքի շրջանակից դուրս է եկել, եւ ցուցարարները ոստիկանների պահանջներին չեն ենթարկվել: Գերատեսչությունից հայտնել էին, որ իրենք որոշել են «հարկադրանքի համաչափ հատուկ միջոցներ» օգտագործվել ֆիզիկական դիմակայությունը կանխելու համար:
Վրաստանի Հանրային հեռուստատեսությունը հայտնում է, որ ցուցարարները ավերել են Ռուսթավելի պողոտայի վրա գտնվող «Վրացական երազանքի» գրասենյակը: Դրանց բացի, ցույցի մի քանի մասնակիցներ փողոցում այրել են «Վրացական երազանք» կուսակցության դրոշը:
«Ազատություն» ռադիոկայանի տեղեկություններով՝ լրագրողները եւ օպերատորները Ռուսթավելի պողոտայում ցույցը լուսաբանելիս տուժել են հատուկջոկատայինների արձակած ռետինե փամփուշտներից:
Տուժածների թվում է Reuters-ի Հարավային Կովկասի թղթակից Մակա Անտիձեն, On.ge լրատվամիջոցի լրագրողներ Գվանցա Նեմսաձեն եւ Աննա Վախտանգաձեն, ինչպես նաեւ «Ռուսթավի 2»-ի օպերատորները:
«Փիրվելի» հեռուսաալիքի տեղեկություններով՝ խորհրդարանի մոտ տեղի ունեցած ցույցի ժամանակ տուժել են Վրաստանի Առաջին ալիքի 3 օպերատոր եւ մեկ լրագրող: Նրանցից երկուսին բժշկական օգնություն է ցուցաբերվել տեղում, երկուսին տեղափոխել են հիվանդանոց միջին ծանրության վնասվածքներով:
