Թերթը գրում է, որ հուշարձանների պահպանման ուղղությամբ մեր երկիրը մի շարք խնդիրներ ունի, եւ դրանք կապված են ինչպես Հայաստանում, այնպես էլ Սփյուռքում գոյություն ունեցող հուշարձաններին: Հուշարձանագետ Սամվել Կարապետյանի փոխանցմամբ` մերօրյա Սփյուռքի նորակառույց որոշ եկեղեցիներ նախագծված են այնպիսի շնչով ու մոտեցումներով, որոնք որեւէ գծով չեն հուշում, որ իրենք հայկական ճարտարապետական հուշարձաններ են:
Սամվել Կարապետյանն ընդգծել է, որ այդ նորակառույց եկեղեցիների մեծ մասը նման են մոդեռնիստական մշակութային տների: «Դրա վառ օրինակներն են Թեհրանում կառուցված Սուրբ Սարգիս ու Սրբոց Վարդանանց եկեղեցիները», ասել է Սամվել Կարապետյանը: Անդրադառնալով հարցին, թե ինչու՞ են այդպիսի եկեղեցիներ կառուցում, հուշարձանագետը նշել է, որ դրանց մի մասի ճարտարապետները նույնիսկ հայեր չեն ու չեն կարող հայկական եկեղեցի կառուցել, գրում է «Ազգ»-ը: