Ամերիկյան Ջորջիա նահանգում մահապատժի են ենթարկել կալանավորին, որը դատապարտվել էր բանտի հսկչին սպանելու համար ավելի քան 20 տարի առաջ, տեղեկացնում է AFP-ն։
42-ամյա Մարիոն Ուիլսոն-կրտսերին մահացու ներարկումը կատարել են տեղի ժամանակով ժամը 21.52-ին Ջեքսոնի բանտում։
Ուիլսոնը դատապարտվել էր սպանության համար, որը կատարել էր 1996 թվականի մարտին «Ժողովրդական ազգ» ավազակային կազմավորման առաջադրանքի շրջանակում։ Նա հանցակցի՝ Ռոբերտ Էռլ Բաթսի հետ միասին հետեւել էր բանտի հսկչին՝ Դոնովան Քորի Փարքսին։ Նրանք մոտեցել էին նրան ավտոկայանատեղիում եւ խնդրել իրենց տուն տանել, բայց հենց հայտնվել են մեքենայում, Բաթսը հանել է ատրճանակը։
Ուիլսոնը եւ Բաթսը ձերբակալվել են, դատապարտվել մահապատժի։ Բաթսը մահապատժի է ենթարկվել 2018-ի մայիսին։
Ուիլսոնը պնդում էր, որ ինքը չի արձակել մահացու կրակոցը։ Սակայն ներման միջնորդությունը մերժվել է։
Մահապատժից առաջ Ուիլսոնն ասել է, որ երբեք ոչ մեկի կյանքը չի խլել։ Նա նաեւ ասել է ընտանիքին, ընկերներին, որ սիրում է նրանց։
Ուիլսոնը 10-րդ դատապարտյալն է, որը մահապատժի է ենթարկվել այս տարի ԱՄՆ-ում։