Վիթխարի տարբերություն կա երկրորդ նախագահ Ռոբերտ Քոչարյանի այս դատավարության եւ այլ դատավարությունների միջեւ: Հունիսի 21-ին մամուլի ասուլիսի ժամանակ այս մասին ասաց նախկին նախագահի փաստաբան Հայկ Ալումյանը:
Մեկնաբանելով Վերաքննիչ դատարանի նիստում երեկ տեղի ունեցած միջադեպը, երբ դատավոր Արմեն Դանիելյանը նախընտրեց չլսել պաշտպանության կողմին, փաստաբանը շեշտեց, որ նման պահվածքն աննախադեպ երեւույթ է: «Պաշտպանության կողմին թույլ չեն տալիս միջնորդություն կատարել, եւ երբ ելույթ ունենալու հերթն է, միջնորդության փաստը դիտարկում են որպես խախտում եւ զրկում ելույթ ունենալու իրավունքից: Չի ստացվի ինչ-որ զուգահեռներ անցկացնել, որովհետեւ նման բան ընդհանրապես չի եղել: Նույնիսկ չենք մտաբերում՝ ՄԻԵԴ-ը ըստ խախտումների ծավալի նման գործ քննե՞լ է»,- արձանագրեց Հայկ Ալումյանը:
Նրա խոսքով՝ փաստաբաններն առաջին իսկ նիստից հայտնել են, որ միջնորդություններ ունեն: Օգտվելով այն հանգամանքից, որ այս դեպքում օրենքը չի կարգավորում քայլերի հաջորդականությունը, դատավորը մշտապես հետաձգում էր պաշտպանության կողմին միջնորդություն ներկայացնելու հնարավորություն ընձեռելու պահը: Այդ պահն այդպես էլ չեկավ: Երբ մեզ ձայն տրվեց, մենք որոշեցինք, որ կարող ենք միջնորդության մասին բարձրաձայնել: Դատավորը միջնորդության փաստը գնահատեց որպես խախտում: Այսպիսի պահվածքին անհնար է իրավական գնահատական տալ: Կարելի է բժշկական գնհատական տալ»,- նշեց փաստաբանը:
Նա շեշտեց, որ 25 օրում անհնար է ծանոթանալ գործի 85 հատորին: «Այսինքն՝ դատավորը մտադիր է որոշում ընդունել մի իրավիճակում, երբ գործին ծանոթ չէ, եւ հրաժարվեց լսել կողմերից մեկին: Այս իրավիճակում ցանկացած որոշում ապօրինի է»,- շեշտեց փաստաբանը:
Նա հիշեցրեց, որ նախկինում գլխավոր դատախազի տեղակալ Գագիկ Ջհանգիրյանը հիմա քաղաքական գործիչ է դարձել եւ կանխատեսումներ է անում: Այսպես՝ նա կանխատեսել է, որ ՍԴ-ն կձգձգի դիմումի քննությունը, որպեսզի դատարաններին հնարավորություն տա ուղղել առաջին ատյանի դատավորի սխալը: «Այսինքն՝ խոսում է Վերաքննիչ դատարանի գործողությունների մասին: Փաստացի նման դասավորության դեպքում ՍԴ որոշումն իմաստից զրկվում է: Ջհանգիրյանը նաեւ կարծում է, որ ՍԴ-ն կա՛մ գործը չի քննի, կա՛մ կքննի այլ կազմով: Այսինքն՝ դատն ավարտված չէ, իսկ որոշումները կանխորոշված են: Սա նշանակում է, որ նրանք վաղուց միջամտել են արդարադատության իրականացմանը եւ վաղուց են որոշել, թե ինչ պետք է անեն ՍԴ-ն եւ Վերաքննիչ դատարանը, եւ անգամ որոշել են հարցը այլ կազմով»,- նշեց Հայկ Ալումյանը՝ հավելելով, որ այս հայտարարությունը դարձել է հանցագործության մասին հաղորդում տալու առիթ: Փաստաբանն ընդգծեց, որ արդարադատության ամբողջ համակարգն աշխատում է, որպեսզի ապահովի Ռոբերտ Քոչարյանի կալանավորումը:
«Արդեն մեկ տարի է, ինչ այս ամենը կատարվում է եւ բոլորի համար պարզ է, որ Քոչարյանի կալանքի համար ոչ մի հիմք չկա, սա կարմիր թելով անցնում է ամբողջ գործով: Երբ վարչապետին զեկուցեցին, որ «գործը ջուր է», սկսեցին միջամտության տարբեր ձեւեր ի հայտ գալ: Բայց դրանք էլ փոքր ազդեցություն ունեն: Այնպիսի տպավորություն է, որ նրանք ստիպված են ավելի ուժեղ եւ խայտառակ միջոցներ ձեռնարկել Քոչարյանի կալանքն ապահովելու համար:
Եթե մեկ տարի առաջ բավական էր զանգը, ապա այժմ, գործի ապօրինի գործողությունների բացահայտմանը զուգընթաց, գործադիր իշխանություններից պահանջվում են ավելի կոպիտ միջոցներ:
Վարչապետը ստիպված էր սպառնալ դատարաններին: Դատավորները հասկանում են, թե ինչ քայլերի են նրանք գնում, արդեն երեք դատավորներ, անկախ տուգանքներից, հրաժարվեցին գործից: Դատավոր Գրիգորյանը որոշեց ազատ արձակել, եւ սկսվեց դատավորի վրա ճնշումը, հեռախոսահամարը եւ հասցեն ձեռքից ձեռք էին փոխանցում: Դուք հասկանում եք, թե ինչի մասին է խոսքը»,- նշեց Հայկ Ալումյանը:
Նրա խոսքով՝ նրանք բողոքելու են դատավոր Դանիելյանի դեմ, թեեւ արդյունք չեն սպասում:
«Պարադոքսն այն է, որ եթե մենք ցանկացած ատյան ցանկացած դատավորի դեմ բողոք ներկայացնենք, եթե դա Քոչարյանի դեմ է, ապա ոչ միայն անհեռանկարային է, այլեւ հակառակ արդյունքն է տալիս: Այնուամենայնիվ, մենք բողոքելու ենք եւ բացառված չէ, որ միջազգային ատյաններ»,- ասաց Ալումյանը:
Նրա խոսքով՝ իրենք բողոքելու են դատավոր Դանիելյանի դեմ, թեեւ արդյունքի չեն սպասում:
«Պարադոքսն այն է, որ եթե մենք ցանկացած ատյան ցանկացած դատավորի դեմ բողոք ներկայացնենք, եթե դա Քոչարյանի դեմ է, ապա դա ոչ միայն անհեռանկարային է, այլեւ հակառակ արդյունքն է տալիս:
Այնուամենայնիվ մենք բողոքելու ենք եւ բացառված չէ, որ միջազգային ատյաններ»,- ասաց Ալումյանը:
Խոսելով դատավոր Դանիելյանի անձի մասին՝ նա նշեց, որ նա անվստահություն է առաջացնում եւ ոչ միայն այդ գործով: «Նա հայտնի անձ է պատվերների կատարման իմաստով: Բոլոր փաստաբանները գիտեն այդ մասին: Ես դեռ չեմ հանդիպել փաստաբանների, որոնք դրական կամ չեզոք են վերաբերվում այդ դատավորի մասնագիտական գործունեությանը: Ի սկզբանե պարզ էր, որ նա դատախազության կամքին հակառակ չի գնալու»,- ասաց փաստաբանը՝ հավաստիացնելով, որ պաշտպանության կողմը կպնդի գործընթացի վերսկման մասին, որպեսզի հնարավորություն ունենա արտահայտել իր կարծիքը:
Հիշեցնենք, որ Վերաքննիչ դատարանի դատավոր Արմեն Դանիելյանը նախօրոին որոշել էր հեռանալ խորհրդակցական սենյակ՝ առանց պաշտպանական կողմին լսելու: