Սահմանադրական դատարանը երկարացնելով երկրորդ նախագահ Ռոբերտ Քոչարյանի եւ այլ պաշտոնատար անձանց գործով դատավոր Դավիթ Գրիգորյանի դիմումը քննելու ժամկետը՝ դրանով իսկ հաստատել է հարցի լրջությունը եւ դիմումի հիմնավորվածությունը: Այս մասին հունիսի 21-ին մամուլի ասուլիսի ժամանակ ասաց սահմանադրական իրավունքի մասնագետ, իրավաբանական գիտությունների թեկնածու Արամ Վարդեւանյանը:
Փորձագետը շեշտեց, որ Սահմանադրության եւ օրենսդրության տրամաբանությամբ՝ գործի կասեցումը եւ ՍԴ դիմելը բողոքարկման ենթակա չէ: «Պատկերացրեք, եթե բողոքարկման ենթակա լիներ, դա պետք է նախատեսեր բոլոր ատյանները: Այդ դեպքում ինչպե՞ս վարվել Վճռաբեկ դատարանի, բարձրագույն ատյանի հետ»,- նշեց փորձագետը: Նրա խոսքով՝ օրենսդրությունը, հակառակը, նախատեսում է որոշում ընդունելուց հետո եռօրյա ժամկետում փոխանցել ՍԴ: Ընդ որում՝ գործի վերսկսում չի նախատեսված մինչեւ ՍԴ որոշման ընդունումը:
Փորձագետը կտրականապես համաձայն չէ դատախազի այն պնդմանը, որ 2008 թվականի մարտի 1-ի իրադարձությունների վերաբերյալ գործով անցնողների նկատմամբ 300.1 հոդվածի կիրառման հետ կապված ոչ մի խնդիր չկա, չնայած հոդվածն ընդունվել է բուն իրադարձություններից մեկ տարի ուշ: Նրա խոսքով՝ ՍԴ-ն իսկապես քննարկել է հարցը, եւ խոսքը վերաբերում է տեխնիկական դետալներին, այն մասին, թե դատարանները կարող են մեկնաբանել սահմանադրական նորմերը: ՍԴ եզրակացությունը կարող են, բայց մեկնաբանությունները վերջնական չեն եւ պարտադիր չեն, իսկ կասկածների դեպքում դատարանը պետք է դիմի ՍԴ: Ինչպես պարզվել է, ոչ մի այլ դեպքում ՍԴ դիմելը չի բողոքարկվել, հայտնեց Արամ Վարդեւանյանը:
«Ավելին՝ ՍԴ-ն մեկ ամսով է երկարացրել քննության ժամկետը: Սովորաբար քննության համար 20 օր է հատկացվում, բայց ՍԴ-ն կարող է երկարացնել: Դատախազությունը սրա վրա ուշադրություն չի դարձրել: Կարծիք կա, որ եթե դատավորի որոշումը հիմնավորված չլիներ, ՍԴ-ն այսպես չէր վարվի: Սա նշանակում է, որ վեճի առարկան այնպիսին է, որ նույնիսկ ՍԴ քննության համար ժամանակ է հարկավոր: Իրավիճակի անհեթեթությունն այն է, որ Վերաքննիչն դատարանը որոշում է կայացնելու մի գործով, որը ՍԴ վարույթում է»,- նշեց փորձագետը:
Հիշեցնենք, որ առաջին ատյանի դատավոր Դավիթ Գրիգորյանը որոշում է ընդունել երաշխավորությամբ նախկին նախագահ Ռոբերտ Քոչարյանին ազատ արձակելու մասին, ինչպես նաեւ որոշում է ընդունել գործի քննությունը կասեցնել եւ փոխանցել ՍԴ 300.1 հոդվածի իրավաչափությունը որոշելու համար: ՍԴ-ն դիմումն ընդունել է: Միաժամանակ դատախազությունը առաջին ատյանի դատարանի որոշումը բողոքարկել է Վերաքննիչ դատարանում: Նախօրեին Վերաքննիչ դատարանը՝ Արմեն Դանիելյանի նախագահությամբ, հրաժարվել է լսել պաշտպանական կողմին եւ խորհրդակցական սենյակ է գնացել որոշում կայացնելու: Նիստը տեղի է ունենալու հունիսի 25-ին: