Հայաստանում իշխում է իրավական բեսպրեդելը: Հունիսի 25-ին լրագրողների հետ հանդիպման ժամանակ այսպիսի ախտորոշում կատարեց քաղաքագետ Աղասի Ենոքյանը՝ մեկնաբանելով Վահե Գրիգորյանի կողմից իրեն Սահմանադրական դատարանի ղեկավար հռչակելը:
Քաղաքագետը նշեց, որ տեղի ունեցածին իրավական գնահատական չի տա, առավել եւս, որ իրավաբաններն արդեն արտահայտվել են: «Իրավաբանների մեծ մասն ասում է, որ դա անհեթեթություն է: Չի կարելի բառախաղով Սահմանդրությունը փոխել»,- նշեց Ենոքյանը:
«Կփորձենք հասկանալ տեղի ունեցողի քաղաքական պատճառները: Լեյտմոտիվն այն է, որ Նիկոլ Փաշինյանը եւ իր թիմը փորձում են իրենց ձեռքը վերցնել ամբողջ դատական համակարգը: Առաջին քայլը դատարանների շրջափակումն էր, որին արձագանքեց հազար մարդուց մի փոքր ավելին, այնուհետեւ Բարձրագույն դատական խորհրդի դատավորների հրաժարականը»,- արձանագրեց Ենոքյանը՝ հիշեցնելով, որ նա ընտրվել է ոչ առաջին փորձից. «Հետաքրքիր է, որ Գրիգորյանը պնդում էր, թե նախագահը լեգիտիմ չէ: Ստացվում է, որ ոչ լեգիտիմ նախագահն է Գրիգորյանին առաջադրել, ընդ որում՝ հիմա Գրիգորյանն իրեն լեգիտիմ է համարում: Կարծում եմ, որ հայտարարությունն այն մասին, որ նա ՍԴ ղեկավարն է, անսպասելի էր նաեւ թիմի համար»:
Քաղաքագետի կարծիքով՝ երկրում հիմա իշխում է իրավական բեսպրեդելը: «Ցանկացած իշխանություն ձգտում է բացարձակ իշխանության: Դրա համար էլ գոյություն ունեն իրավական հակակշիռները: Սահմաններ կան, որոնք չի կարելի անցնել: Հայաստանում ընդդիմություն չկա, եւ չկա մեկը, որ իրեն հակադրի իշխանությունների գործողություններին: Այս պատճառով իշխանություններին թվում է, որ իրենց ամեն ինչ թույլատրելի է: Արդյունքը երկրում անկայունությունն է»,- նշեց քաղաքագետը:
Աղասի Ենոքյանը դժվարացավ կանխատեսումներ կատարել, թե ինչպիսին կլինի հանգուցալուծումը: «Եթե Վահե Գրիգորյանն իրականացնի իր փոփոխությունները, քաոսը կխորանա: Բայց նահանջել էլ չի ստացվի, որովհետեւ ստիպված կլինի ասածի համար պատասխան տալ»,- զգուշացրեց Ենոքյանը: