2049 թվականին Միացյալ Նահանգների պետական պարտքը կհասնի «աննախադեպ մակարդակի»՝ երկրի ՀՆԱ 144 տոկոսին: Այս մասին նշված է երեքշաբթի հրապարակված ԱՄՆ Կոնգրեսի Բյուջետային վարչության զեկույցում, փոխանցում է ՏԱՍՍ-ը:
Փաստաթղթում ընդգծվում է, որ պետպարտքը այսպիսի ցուցանիշի կհասնի՝ կապված բյուջեի պակասուրդի բարձր մակարդակի եւ երկրի գործող օրենսդրության նորմերի հետ: Զեկույցի հեղինակների խոսքով՝ պետպարտքը 2019 թվականի ՀՆԱ 78 տոկոսից 2029 թվականին կմեծանա մինչեւ 92 տոկոս:
«Պարտքի նման մակարդակը երկրի պատմության մեջ ամենաբարձրը կլինի եւ էլ ավելի կաճի: Բյուջեի մեծ պակասուրդի եւ աճող պարտքի հեռանկարը երկրի համար զգալի վտանգներ է պարունակում եւ քաղաքական գործիչների առջեւ լուրջ դժվարություններ է առաջացնում»,- նշված է զեկույցում:
Խելացի շտկել
Վարչությունն առաջարկում է առաջիկայում փոփոխություններ կատարել գործող օրենսդրության մեջ, որպեսզի կանգնեցվի պետպարտքի աճը: Փաստաթղթում, սակայն, ընդգծվում է, որ պետք է ողջամիտ շտկումներ արվեն: Այսպես՝ եթե Կոնգրեսը հարկման ծրագրերի եւ պետական ծախսերի օրենսդրությամբ հաստատված փոփոխությունները անվավեր համարի, ինչին աջակցում են շատ քաղաքական գործիչներ, պետպարտքը կարող է աճել մինչեւ ՀՆԱ 219 տոկոս:
Մարտի սկզբին ԱՄՆ ֆինանսների նախարարությունը ֆինանսական գործարքները շարունակելու համար «արտակարգ միջոցառումներ» է օգտագործել՝ կապված այն հանգամանքի հետ, որ երկիրը հասել է պետպարտքի առաստաղին, որը օրենսդիրները առաջիկայում պետք է բարձրացնեն: Այս որոշումը ԱՄՆ կառավարությանը թույլ կտա ժամանակավորապես շարունակել վճարել հաշիվները՝ չխախտելով օրենքով սահմանված պետպարտքի առաստաղը:
ԱՄՆ պետպարտքը
Ներկա պահին ԱՄՆ պետպարտքը կազմում է մոտ 22,1 տրլն դոլար։ Ինչպես ընթացիկ տարվա հունվարի սկզբին տեղեկացրել է CNN հեռուստաալիքը, որը վերլուծել է ֆիննախի տվյալները, Դոնալդ Թրամփի նախագահության երկու տարում (2017 թվականի հունվարի 20-ից) այն ավելացել է ավելի քան 2 տրլն դոլարով։
ԱՄՀ կանխատեսումների համաձայն՝ ԱՄՆ պետպարտքը 2023-ին կավելանա՝ կազմելով մինչեւ ՀՆԱ 117 տոկոս։
2018 ֆինանսական տարում (ԱՄՆ-ում սկսվում է հոկտեմբերի 1-ից) պետպարտքին պետք էր վեց ամսից մի փոքր ավելի, որպեսզի 20 տրիլիոնից բարձրանար 21 տրիլիոն դոլարի։ Կոնգրեսի պահպանողականներն, ընդ որում, հայտարարում են, որ կառավարության ծախսերը շարունակում են մնալ անվերահսկելի, եւ դա կարող է հանգեցնել էլ ավելի մեծ պակասուրդի հաջորդ տարիներին։
