Բարձր տեխնոլոգիաների ոլորտի զարգացումը ՀՀ կառավարության առաջնահերթություններից է, որի նպատակն է հայ գիտական ներուժի վրա հիմնված գիտելիքահեն տնտեսության զարգացումն ու առաջընթացը։
ՀՀ բարձր տեխնոլոգիական արդյունաբերության նախարարությունից NEWS.am-ին հայտնում են, որ այդ ուղղությամբ իրականացվող քայլերից մեկն էլ տեխնոլոգիական ոլորտի նորաստեղծ ընկերություններին հարկային արտոնությունների տրամադրումն է։ ՀՀ ազգային ժողովի կողմից 2019թ. ապրիլին ընդունված եւ մայիսի 18-ից ուժի մեջ մտած «Տեղեկատվական տեխնոլոգիաների ոլորտի պետական աջակցության մասին» ՀՀ օրենքի փոփոխությունները նոր հնարավորություն են տեխնոլոգիական ոլորտի նորաստեղծ ընկերությունների գործունեության համար։
Հավաստագիր ստանալու համար բարձր տեխնոլոգիական արդյունաբերության նախարարություն դիմող ընկերությունների թիվն օր օրի ավելանում է:
Այս պահի դրությամբ նախարարություն է դիմել շուրջ 100 ընկերություն։
Հավաստագրման հանձնաժողովի առաջին եւ երկրորդ նիստերով արտոնություն է տրամադրվել 41-ին։
Դիմող ընկերությունները գործունեություն են ծավալում տարբեր ուղղություններով՝ ինժեներական, էլեկտրոնային առեւտուր, վեբ-դիզայն, մոբայլ հավելվածների ստեղծում, վճարահաշվարկային համակարգերի ստեղծում, էլեկտրոնային թեստավորում եւ այլն:
Միայն այս 41 ընկերությունների գործունեության արդյունքում կստեղծվի 200-240 աշխատատեղ: «Այս օրենքը նորաստեղծ, սկսնակ ընկերություններին առաջին հերթին տալիս է հավատ, հույս եւ նաեւ եռանդ, որ Կառավարությունն ամեն ինչով աջակցում է, հանձինս մեր նախարարի մեծ ջանքերի, այս ոլորտի զարգացմանը։ Սա մեկնարկային կետ է այս ընկերությունների համար, որպեսզի սկզբնական շրջանում, որը բավականին ծախսատար է, այդ հնարավորության շնորհիվ կարողանան թեւերը բացած առաջ գնալ»,- ասաց «ԴԱՏԱԱՐՏ» ընկերության տնօրեն Արսեն Բաղդասարյանը:
Հարկային արտոնություն ստանալու համար դիմած ստարտափների թվում կան նաեւ հայրենադարձներ։ Նրանք հավատացած են, որ Հայաստանում ստեղծվել են այնպիսի պայմաններ, որոնք տեխնոլոգիական ոլորտի գործարար ծրագրերը զարգացնելու, լայն գործունեություն ծավալելու հնարավորություն են տալիս։ Նրանք վերադարձել են հայրենիք՝ այստեղ ապրելու ու աշխատելու, իրենց նորարարական գաղափարներով Հայաստանը ճանաչելի դարձնելու աշխարհին։
4 ամիս առաջ Վազգենն ու եղբայրը մասնակցել են Դիլիջանում կայացած ստարտափ նորարարական տեխնոլոգիաներ համաժողովին, որտեղ տեղեկացել են նոր ստեղծվող կազմակերպություններին Կառավարության կողմից տրվող արտոնությունների մասին։
Ֆրանսիայում իրենց բիզնեսն ունեին, բայց որոշեցին եղբոր հետ գալ ու հաստատվել Հայաստանում։ Առայժմ 10 աշխատող ունեն, բայց համոզված են, որ հարկային արտոնությունների շնորհիվ կարճ ժամանակում առաջընթաց կունենան։
Դիանան ընտանիքով եկել է Ավստրիայից, որտեղ բնակվել են վերջին 4 տարիներին։ Դրանից առաջ 13 տարի ապրել ու աշխատել են Կալիֆորնիայում։
Ամուսինը ավստրիացի է, ինքն էլ է միացել կնոջ հայրենադարձության գաղափարին ու որոշել հաստատվել Հայաստանում։ Արդեն մեկ տարի է՝ այստեղ են։ Հմտացած են տվյալների մշակման տեխնոլոգիաներում: Դեռ աշխատակազմ չունեն։ Փորձում են այստեղի տաղանդավոր երիտասարդներին գտնել, նախապատրաստել, սովորեցնել, հմտացնել այս ուղղության մեջ եւ նրանց ներառել արտասահմանյան նախագծերում։
Լուսինե Մնացականյան. եկել են Հոլանդիայից։ Այստեղ հիմնել են իրենց ընկերությունը, որն առաքման լոգիստիկ աշխատանքներով է զբաղվում։ Ունեն 5 աշխատող։
Փոփոխությունների համաձայն` նորաստեղծ ընկերություններին հավաստագրով տրամադրվում են հետեւյալ հարկային արտոնությունները` 0% շահութահարկ եւ 10% եկամտային հարկ։ Միեւնույն ժամանակ սահմանված են մի շարք պահանջներ ու չափորոշիչներ, ինչպես օրինակ` աշխատակիցների թիվը չպետք է գերազանցի 30-ը, ընկերությունները չպետք է ստեղծվեն այլ տնտեսավարող սուբյեկտի վերակազմակերպման արդյունքում:
