Վարչապետը որպես նշանակման բաղադրիչներից մեկն է դա նշել: Այս մասին, այսօր՝ հունիսի 27-ին, ԱԺ-ում լրագրողների հետ զրույցում նշեց Սյունիքի մարզպետ Հունան Պողոսյանը՝ անդրադառնալով լրագրողների հիշեցմանը, որ իրեն նշանակելիս վարչապետ Նիկոլ Փաշինյանը հայտարարել էր, որ Սյունիքի մարզը նարկոթրաֆիկի կետ է եւ իր նշանակումը դրանով պայմանավորեց:
«Ես համակարգելու եմ այդ աշխատանքները, իսկ իրավապահ համակարգը եւ տեղում եւ կենտրոնական ապարատի համապատասխան ծառայությունները շատ նորմալ աշխատում են փոխհամաձայնեցված, ունեն տեսանելի արդյունքներ: Եթե ուզում եք թվեր, դիմեք ոստիկանություն, ԱԱԾ, ՊԵԿ-ի մաքսային ծառայություն»,-ասաց մարզպետը:
Դիտարկմանը, որ նախօրեին ոստիկանությունը միայն Սյունիքի մարզում 65 մարդ է բերման ենթարկել, արդյոք մարզում կա՞ն «սեւազգեստ» մարդիկ, որոնց մասին խոսել էր վարչապետը, Հունան Պողոսյանն ասաց. «Այդ հարցերը պետք է տաք ոստիկանության համակարգին»:
