Հայաստանի Ազգային ժողովում խորհրդարանի Տնտեսական հարցերի մշտական հանձնաժողովի նախաձեռնությամբ հունիսի 27-ին ընթանում է աշխատանքային բանավեճ «Կաթի շուկայում ընթացիկ իրավիճակի մասին» թեմայով, տեղեկացնում է NEWS.am-ի թղթակիցը։
Քննարկմանը մասնակցում են ինչպես խորհրդարանականներ, այնպես էլ բիզնեսի, հասարակական կազմակերպությունների ներկայացուցիչներ։ Բանավեճի մասնակիցները քննարկել են ԳՕՍՏ-ի խնդիրները, անդրադարձել հանրապետությունում անկախ եւ օբյեկտիվ լաբորատորիաների կազմավորման հարցին, որոնք կունենան աշխատակիցների ու փորձագետների պրոֆեսիոնալ կազմ։
Մասնավորապես, խորհրդարանական հանձնաժողովի ղեկավար, «Իմ քայլը» դաշինքի պատգամավոր Բաբկեն Թունյանը նշեց, որ վստահության մակարդակը հասարակությունում գիտափորձագիտական լաբորատորիաների հանդեպ շատ ցածր է։ «Ինչ-որ ԶԼՄ լրագրողական հետաքննության շրջանակում կարող է շուկայի մոնիթորինգ իրականացնել, փորձաքննության համար այս կամ այն ընկերության արտադրանքը վերցնել, ուղարկել ստուգման երկու տարբեր լաբորատորիաներ եւ ստանալ երկու միանգամայն տարբեր պատասխան։ Եվ այդ արդյունքների մասին տվյալները կարող են բավական լրջորեն ազդել շուկայի իրավիճակի վրա»,- պարզաբանել է Թունյանը։
Ընդ որում՝ նա ընդգծել է, որ ընկերությունը, որին պատկանել է այդ արտադրանքը, չի կարող դատի տալ ԶԼՄ-ին, որը հրապարակել է այդ հետազոտությունների տվյալները, քանի որ հետազոտություններն իրականացվել են միայն զանգվածային լրատվամիջոցի պատվերով, բայց անմիջական գործընթացը եւ պատասխանատվությունն արդյունքների համար ընկնում են այդ հետազոտությունն իրականացնող գիտահետազոտական լաբորատորիաների վրա։
