Ֆրանսիայի նախագահ Էմանուել Մակրոնը մտադիր է Օսակայում (Ճապոնիա) G20-ի գագաթնաժողովի շրջանակում ԱՄՆ նախագահ Դոնալդ Թրամփի հետ հանդիպման ժամանակ նրան համոզել մասնակիորեն հրաժարվել Իրանի դեմ պատժամիջոցներից, հաղորդում է ՏԱՍՍ-ը՝ հղում անելով Reuters-ին:
«Ցանկանում եմ Թրամփին համոզել, որ իր շահերից է բխում բանակցային գործընթացի վերսկսումն ու պատժամիջոցների չեղարկումը»,- ասել է Մակրոնը Տոկիոյից Կիոտո մեկնող գնացքում լրագրողների հետ զրույցում:
Նրա խոսքով՝ Թեհրանի եւ Վաշինգտոնի միջեւ Իրանի միջուկային ծրագրի եւ տարածաշրջանում գործողությունների քննարկումը կարող է մի քանի ամիս տեւել: Ֆրանսիայի նախագահը հավելել է, որ Թրամփի հետ կհանդիպի վաղը:
Ավելի վաղ Մակրոնը հեռախոսազրույց էր ունեցել Իրանի նախագահ Հասան Ռոհանիի հետ, որի ընթացքում իր գործընկերոջը զգուշացրել է միջուկային ծրագրից դուրս գալու մասին: Մակրոնի խոսքով՝ դա սխալ կլինի: