ՆԱՏՕ-ն պատմության մեջ առաջին անգամ տիեզերական ռազմավարություն է մշակել: Այս մասին Twitter-ում գրել է դաշինքի գլխավոր քարտուղար Յենս Ստոլտենբերգը, հաղորդում է DW-ը:
Դաշինքում կարծում են, որ ապագայում ռազմական հակամարտությունները կարելի է լուծել նաեւ տիեզերքում, օրինակ՝ ռազմավարական կարեւորություն ունեցող արբանյակների վրա հարձակմամբ կամ տիեզերքում զենքի կիրառմամբ:
Բացի այդ, ՆԱՏՕ-ն տարեվերջին կարող է տիեզերքն առանձին տարածք հայտարարել՝ ռազմական օպերացիաների անցկացման համար: Դա կապահովի հավելյալ ռեսուրսների տրամադրումն ու թույլ կտա դիտարկել հնարավոր տիեզերական հարձակումները:
Ավելի վաղ՝ 2016 թվականին, ՆԱՏՕ-ն կիբերտարածքը օպերացիաների անցկացման համար առանձին տարածք է հայտարարել:
Տիեզերքի նկատմամբ ուշադրության առիթ է դարձել այն փաստը, որ ՆԱՏՕ-ն առավել մեծ կախում ունի օդային տարածքում տեխնիկայից: Արբանյակների միջոցով ռազմական օպերացիաների ժամանակ հաղորդակցում է իրականացվում:
Մյուս կողմից, դա նշանակում է, որ ՆԱՏՕ-ի անդամ երկրներին պատկանող արբանյակների վրա հարձակումները կարող են սահմանափակել պաշտպանունակությունը:
Բացի այդ, հարձակումները կարող են օգտագործվել հասարակական կյանքի մի մասի պարալիզացման համար:
ԱՄՆ-ից բացի, իրենց տիեզերական հնարավորությունների մասին հայտարարել են Ռուսաստանը, Չինաստանն ու Հնդկաստանը: