Ես անձամբ դեմ չեմ, որ շուկայում գերիշխող դիրքով ընկերություններ եւ կազմակերպություններ լինեն: Հունիսի 28-ին ԱԺ արտահերթ նիստին ՏՄՊՊՀ անդամի թափուր պաշտոնի ընտրության քննարկման ժամանակ այս մասին հայտարարեց այդ պաշտոնի թեկանծու, տնտեսագետ Էդգար Ճաղարյանը՝ պատասխանելով ԲՀԿ-ից պատգամավոր Սերգեյ Բագրատյանի հարցին, որը թեկնածուից հետաքրքրվեց, թե ինչ առաջարկներ նա ունի մենաշնորհային ընկերությունների դերի եւ դիրքի նվազեցման վերաբերյալ եւ որպեսզի ոչ մի տնտեսվարող սուբյեկտ չկարողանա չարաշահել շուկայում իր գերիշխող դիրքը: Ճաղարյանի խոսքով՝ մենաշնորհները վկայույթյուն են, որ իրենց սեփականատերերը որոշակի հաջողությունների են հասել:
«Նրանք ի տարբերություն մյուսների փոքր շահույթ են ակնկալել եւ արդյունքում մենաշնորհատեր են դարձել: Սակայն հենց մենաշնորհատերերն են ամեն օր գտնվում ՏՄՊՊՀ-ի վերահսկողության տակ, որպեսզի նրանց մոտ հնարավորություն չառաջանա չարաշահել իրենց դիրքը:
Մենք պետք է բացառենք անբարեխիղճ մրցակցության դրսեւորումները այլ կառույցների հետ համագործակցությամբ՝ օգտագործելով ՏՄՊՊՀ ամբողջ գործիքակազմը՝ պայքարելով անբարեխիղճ մրցակցության բոլոր դրսեւորումների դեմ», - ասաց Ճաղարյանը:
