Թուրքիայի Սամանադրական դատարանն անօրինական է ճանաչել գերմանական Die Welt պարբերականի թղթակից Դենիզ Յուջելին կալանքի տակ պահելը:
Քննչական մեկուսարանում ապօրինի պահելը խախտել է Յուջելի անձնական անվտանգության, ազատության եւ ազատ խոսքի իրավունքը, նշված է դատարանի որոշման մեջ: ՍԴ-ն իշխանություններին պարտավորեցրել է լրագրողին 25 հազար թուրքական լիրա (3800 եվրո) փոխհատուցում վճարել, փոխանցում է DW-ն:
ՍԴ-ն միաժամանակ թուրքական իշխանությունների կողմից խոշտանգումների արգելքի մասին օրենքի խախտման նշաններ չի գտել, ինչի պնդում էր կատարել Յուջելը: Լրագրողը պնդում է, որ մեկուսարանում բազմիցս ծեծի ու սպառնալիքների է ենթարիկվել:
Փաստաբան Վեյսել Օկը դատարանի որոշումը մեկնաբանելով՝ արձանագրել է, որ Յուջելին անհնար է որեւէ բանում մեղադրել, բացի լրագրությունից: Նա միաժամանակ իր հիսթափությունն է հայտնել, որ Անկարայի դատարանը որոշումն ավելի վաղ չէր կայացրել:
Դենիզ Յուջելը 2017 թվականի փետրվարից թուրքական մեկուսարանում է անցկացրել գրեթե մեկ տարի, դրանից 9 ամիսը՝ մենախցում: Այս ընթացքում նրան այդպես էլ մեղադրանք չի առաջադրվել: Այն բանից հետո, երբ դատախազությունն, այնուամենայնիվ, մեղադրական եզրակացություն է կայացրել, լրագրողին ազատել են Ստամբուլի մոտ գտնվող Սիլիվրի բանտից, որից հետո նա Թուրքիայից հեռացել է: 2018 թվականի հունիսից Յուջելին Թուրքիայում հեռակա են դատում: Նրան մեղադրում են ահաբեկչության քարոզչության եւ ազգային երկպառակություն սերմանելու մեջ:
Թուրքիայում կալանքից ազատվելուց հետո Դենիզ Յուջելը հուլիսին կվերականգնի մշտական աշխատանքը Die Welt-ում: 45-ամյա լրագրողը կլուսաբանի Գերմանիայի դաշնային արեւելյան հողերի խորհրդարանական ընտրությունները:
