Ինդոնեզիայի իրավապահ մարմինները կալանավորել են Ասիայում խոշորագույն «Ջամաա Իսլամիա» ահաբեկչական խմբավորման ենթադրյալ պարագլխին, ով 16 տարի հետախուզման մեջ էր: Այս մասին հայտնում է The Straits Times պարբերականը՝ վկայակոչելով ոստիկանական աղբյուրների տեղեկությունները:
«Փարա Վիջայանթոն կալանավորվել է անցյալ շաբաթ Բեքասիի իր տանը: Նրա տանը սառը զենք է հայտնաբերվել, առգրավվել է գրականություն, ինչպես նաեւ տեսանյութեր»,- հայտնել է ոստիկանությունում աղբյուրը: Առայժմ այլ մանրամասներ չեն ներկայացվում:
Ինդոնեզիայի իրավապահ մարմինները Վիջայանթոյի որոնումներ էին իրականացնում 2003 թվականից՝ մի շարք ահաբեկչական հարձակումներին մասնակցության մեղադրանքով, այդ թվում 2002 թվականին Բալի կղզում ամենարյունահեղ հարձակմանը: Այդ ժամանակ «Ջամաա Իսլամիա»-ի գրոհայինները մի քանի պայթյուններ էին իրագործել հանրահայտ Կուտա տեղանքում, ինչպես նաեւ ԱՄՆ գլխավոր հյուպատոսության շենքի մոտ: Արդյունքում մահացել էր 202 մարդ, որոնցից 164-ը արտասահմանցիներ էին, վիրավորվել էր 200-ից ավելին: Հատուկ ծառայությունների ներկայացուցիչները կարծում են, որ 2008 թվականին կալանավորված անձը ղեկավարել է այս խմբավորումը, որը գործում է նաեւ Մալայզիայում, Թաիլանդում եւ Ֆիլիպիններում: