Առնվազն ինը մարդ է տուժել Սաուդյան Արաբիայիում Աբհա քաղաքի վրա հուսիների հարձակումից, տեղեկացնում է ՌԻԱ «Նովոստի»-ն՝ հղում կատարելով սաուդյան Saudi Gazette պարբերականին։
Պարբերականի տվյալներով՝ տուժածների մեջ եղել են Սաուդյան Արաբիայի ութ եւ Հնդկաստանի մեկ քաղաքացիներ։
Ավելի վաղ Արաբական կոալիցիան հաստատել էր, որ հուսիները հարված են հասցրել Սաուդյան Արաբիայի Աբհա քաղաքի միջազգային օդանավակայանին։ Օդանավակայանն արդեն վերսկսել է աշխատանքը նորմալ ռեժիմով։
Ռազմաքաղաքական կոնֆլիկտը Եմենում կառավարության եւ շիական «Անսար Ալա» շարժման ապստամբ հուսիների միջեւ շարունակվում է 2014 թվականից։ Կառավարության կողմում 2015 թվականի մարտից հանդես է գալիս արաբական երկրների ռազմական կոալիցիան Սաուդյան Արաբիայի գլխավորությամբ։ 2018-ի դեկտեմբերին հակամարտության կողմերը Եմենում առաջին անգամ մի քանի տարվա ընթացքում հանդիպել են բանակցությունների սեղանի շուրջ, որոնք կազմակերպվել էին ՄԱԿ հովանու ներքո Ստոկհոլմում։ Նրանց հաջողվեց հասնել մի շարք կարեւոր համաձայնությունների, մասնավորապես՝ գերիների փոխանակման, Կարմիր ծովի Հոդեյդա նավահանգիստ-քաղաքում հրադադարի եւ այն հուսիների կողմից ՄԱԿ վերահսկողությանը հանձնելու վերաբերյալ։