Դաշնային դատավոր Կլաուդիո Բոնադիոն որպես վկա հարցաքննության է կանչել Արգենտինայի նախագահի թեկնածու Ալբերտո Ֆերնանդեսին Բուենոս Այրեսում 1994 թվականին ահաբեկչության հետաքննությանը խոչընդոտելու գործով, տեղեկացնում է ՏԱՍՍ-ը՝ հղում կատարելով Mitre-ին։
Գործով մեղադրյալ է ճանաչվել սենատոր եւ երկրի նախկին նախագահ Քրիստինա Ֆերնանդես դե Կիրշները, որն առաջադրվել է փոխնախագահ Ալբերտո Ֆերնանդեսի հետ միասին։ Քաղաքական գործիչը, որը գլխավորել է կառավարությունը 2003-2008 թվականներին, պետք է դատարան ներկայանա հուլիսի 10-ին։
Նա պետք է պատասխանի համաձայնագրի մասին հարցերին, որն Արգենտինան կնքել է Իրանի հետ 2013 թվականին։ Դատավորը Ֆերնանդեսին դատարան է կանչել ստորագրված փաստաթղթի մասին նրա քննադատական ելույթներից հետո։ La Nacion թերթի հարցազրույցում նա ասել է, որ «միշտ դա վատ համաձայնագիր է համարել»։
2015-ի հունվարին դատախազ Ալբերտո Նիսմանը Ֆերնանդես դե Կիրշների եւ ԱԳՆ նախկին նախարար Էկտոր Թիմերմանի հանդեպ ահաբեկչության հետաքննությանը խոչընդոտելու մեղադրանքներ է առաջադրել, որը տեղի է ունեցել 1994 թվականին հրեական մշակութային կենտրոնի մոտ եւ 85 մարդու կյանք է խլել։ Նրա կարծիքով, կառավարությունն Իրանի հետ բանակցություններ է վարել Արգենտինայի համար շահավետ համաձայնագրի մասին նավթի դիմաց ցորենի մատակարարումների վերաբերյալ։ Դատախազը պնդում էր, որ համաձայնագրի պայմաններից մեկը եղել է պատասխանատվությունից հինգ իրանցու ազատ արձակումը, որոնք որոնվում էին Արգենտինայի կողմից ահաբեկչությանը հանցակցության հետ կապված։ Նիսմանը պետք է իր ապացույցները ներկայացներ Կոնգրեսին, բայց դրանից մեկ օր առաջ նրան մեռած են գտել իր բնակարանում։
Նախկին նախագահն անցնում է մի քանի քրեական գործով, նրան մեղադրում են վատնումների, փողերի լվացման, կոռուպցիայի եւ ահաբեկչությունների հետաքննությանը խոչընդոտելու մեջ։ Ֆերնանդես դե Կիրշներն իրեն համարում է քաղաքական հետապնդման զոհ, նրան կալանումից կփրկի խորհրդարանական իմունիտետը։
