ՄՊՀ մասնաճյուղը ամրապնդում է Հայաստանի հիմքերը, հայ-ռուսական հարաբերությունների հիմքերը: Այս մասին հուլիսի 2-ին Մոսկվայի պետական համալսարանի երեւանյան մասնաճյուղի շրջանավարտներին դիպլոմներ հանձնելու արարողության ժամանակ ասաց Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը:
Նրա խոսքով՝ այդ հարաբերություններում կրթության ոլորտը նշանակալի դերակատարում ունի:
«Ես հույս ունեմ, որ մեր հարաբերությունների ամրապնդման գործում կրթության դերը միայն կմեծանա, քանի որ այն մեր բազմադարյա կապերին լրացուցիչ կայունություն է հաղորդում եւ, ինչն անչափ կարեւոր է, հեռանկարայնություն»,- նշեց դեսպանը:
Նա շեշտեց, որ պետությունն իր երիտասարդներին կրթություն տրամադրելով՝ ամրացնում է հիմքերը, իսկ ՄՊՀ-ն հենց դրանով է զբաղվում:
«Մոսկվայի պետական համալսարանի երեւանյան մասնաճյուղի այսօրվա շրջանավարտները խոսում են այն մասին, որ բուհը կայացել է: Այս մասին է վկայում այստեղ Հայաստանի վարչապետի եւ երկրի կրթության, գիտության, մշակույթի եւ սպորտի նախարարի ներկայությունը»,- հայտարարեց Սերգեյ Կոպիրկինը:
Դեսպանը հավելեց, որ բուհում շատ լավ ներուժ է ստեղծվել, եւ այս իմաստով կարեւոր է, որ հաջորդ տարի սպասվում է նաեւ մագիստրատուրայի բացում:
Նշենք, որ հուլիսի 2-ին տեղի է ունեցել Մոսկվայի պետական համալսարանի երեւանյան մասնաճյուղի շրջանավարտներին դիպլոմներ հանձնելու արարողությունը: Միջոցառմանը մասնակցում է Հայաստանի վարչապետ Նիկոլ Փաշինյանը: